Iċ-champions tal-futsal femminili Lija Athletic telgħu waħedhom fl-ewwel post tal-klassifika tal-Enemed Women’s League meta ddominaw il-konfront tagħhom kontra Parr Mela tant li rebħu 11-2.
Sa tmiem l-ewwel taqsima, it-tim immexxi minn Jackie Abdilla stabilixxa vantaġġ ta’ 5-1 sabiex baqa’ jikkontrolla l-partita għat-tliet punti prezzjużi.
Leanne Micallef kienet il-protagonista għal Lija meta skorjat erba’ gowls b’Ruth Steer Cheetham awtriċi ta’ tripletta. Nell Zarb Cousin skorjat doppjetta filwaqt li Lorna Zahra u Tove Ronneback għaqqdu l-iskor għat-tim rebbieħ.
Edna Vargas skorjat doppjetta għal Parr Mela.
Referees kienu Marco La Rosa u Andrea Naudi.
Gowl uniku skorjat minn Demi Magrin għen lil Mtarfa jirritornaw għar-rebħ kontra Zero Sei. Wara l-gowl inizjali, Mtarfa ikkontrollaw tajjeb minkejja l-attakki ta’ Zero Sei bil-goalkeeper Karen Lia li wettqet numru ta’ interventi deċiżivi.
Referees kienu Marco La Rosa u Jonathan Balzan.
Swieqi United xejn ma sabuha faċli sabiex jegħlbu l-isfida iebsa li tawhom Santa Margherita bl-iskor finali jkun 2-1.
Swieqi marru fil-vantaġġ fl-ewwel taqsima permezz ta’ Michela Felice sabiex Edera Marmara ġabet l-iskor indaqs għal Santa Margherita kmieni fit-tieni taqsima.
Il-gowl rebbieħ għat-tim bi flokkijiet oranġjo ġie skorjat minn Michela Felice li b’hekk wettqet doppjetta personali u għenet lit-tim tagħha jitla’ fit-tieni post tal-klassifika.
Referees kienu Stephen Vella u Danilo Francalanza.
KLASSIFIKA – ENEMED WOMEN’S FUTSAL LEAGUE
Lija Women Futsal 13 Swieqi United Women’s Futsal LEC 07 12 , Zero Sei 10, Mtarfa Women 9, Santa Margherita Women’s Futsal 6, Parr Mela Pebbles Women’s Futsal 3, Iklin Women’s Futsal 0.
