Il-kumpanija GO plc organizzat il-Laqgħa Ġenerali Annwali tagħha, fejn l-azzjonisti ġew ippreżentati b’riżultati finanzjarji importanti ħafna għas-sena finanzjarja 2025 flimkien ma’ viżjoni għall-ġejjieni tal-Grupp.
GO fissret l-2025 bħala “sena importanti fuq kull front”, sena li fiha iċċelebrat il-50 anniversarju tagħha b’nofs seklu ta’ Malta konnessa permezz ta’ investimenti u innovazzjoni kontinwi. Matul l-2025, il-Grupp temm il-proġett nazzjonali ta’ True Fibre rollout, programm ta’ infrastruttura ta’ €100 miljun li jqiegħed lil Malta b’mod sod fost il-mexxejja Ewropej fil-konnettività fibre-to-the-home. Fl-istess ħin, GO kompliet issaħħaħ il-pożizzjoni tagħha bħala fornitur ewlieni tal-internet u bħala l-operatur mobbli li qed jikber l-aktar malajr fuq il-gżira.
Ir-riżultati finanzjarji kienu storiċi wkoll.
“Għall-ewwel darba fl-istorja tagħna, id-dħul ta’ GO qabeż il-€254 miljun, l-ewwel darba li l-kumpanija qabżet il-limitu tal-kwart ta’ biljun ewro, bil-profitt nett jiżdied b’32% fuq is-sena ta’ qabel għal €20.7 miljun, rekord ukoll. Madwar 30% ta’ dan id-dħul issa ġej minn barra s-servizzi tradizzjonali tat-telekomunikazzjoni, li jirrifletti s-saħħa tal-istrateġija tagħna. L-għan ewlieni tagħna fin-negozju hu li nkomplu niksbu l-fiduċja. Dik il-fiduċja hija l-aktar assi prezzjuż tagħna, u hija l-pedament tat-tkabbir futur tagħna,” qal Nikhil Patil, il-Kap Eżekuttiv tal-Grupp GO plc.
L-EBITDA kiber għal €92 miljun, filwaqt li l-operating cash flow issaħħet għal €73.9 miljun. Il-Bord qed jirrakkomanda dividend nett totali ta’ 16-il ċenteżmu għal kull sehem għall-2025, l-ogħla dividend ordinarju li ngħata f’ħames snin, bħala parti minn rekord ta’ seba’ snin li fihom, GO qassmet iżjed minn €162 miljun lill-azzjonisti tagħha.
Lil hinn mit-telekomunikazzjoni
B’mod kruċjali, madwar 30% tad-dħul tal-Grupp issa ġej minn attivitajiet barra s-servizzi tradizzjonali tat-telekomunikazzjoni, bidla strateġika intenzjonata u li qed tkompli tikber. Sussidjarji inklużi BMIT Technologies, AQS Energy, SENS Innovation, Connected Care, Cybersift, Klikk, GO Ventures u Cablenet f’Ċipru qed jikkontribwixxu kollha għal ekosistema diġitali u tal-enerġija usa’.
“F’sena ta’ bidla teknoloġika mgħaġġla u aspettattivi dejjem jiżdiedu tal-klijenti, GO mhux biss żamm il-pass, iżda mexxa. Il-Grupp GO jeżisti biex itejjeb il-ħajja tan-nies, mhux biss biex ibigħ servizzi. Investiment fit-tul u r-redditu għall-azzjonisti qatt ma kienu kontradizzjoni għal GO iżda jimxu id f’id,” qal Lassaad Ben Dhiab, Chairman ta’ GO plc.
Matul l-aħħar ħames snin, AQS installat aktar minn 50,000 pannell fotovoltajku, li jiġġeneraw aktar minn 25 miljun kWh ta’ elettriku u jevitaw madwar 10,000 tunnellata ta’ emissjonijiet tas-CO₂. Connected Care jappoġġja aktar minn 10,000 persuna biex jgħixu b’mod sigur u indipendenti d-dar. Klikk irreġistra tkabbir ta’ 46% fid-dħul fuq sena.
Cybersift qed jipproteġi l-ekosistema diġitali ta’ Malta u estenda l-kollaborazzjoni tiegħu ma’ Cablenet f’Ċipru. GO Ventures investa f’Airalo, li minn dak iż-żmien laħqet status ta’ unicorn, u ġġenera dħul fuq l-investiment inizjali. Filwaqt li BMIT għamlet investiment strateġikament importanti ta’ €25 miljun għal sehem ta’ 49% f’Malta Properties Company.
“Id-dħul li mhux ġej mit-telekomunikazzjoni issa jammonta għal €68.2 miljun u qed ikompli jikber. Dan mhux aċċidentali. Huwa r-riżultat li ridna, frott strateġija biex tinbena ekosistema diġitali u tal-enerġija usa’ madwar in-negozju ewlieni tagħna, waħda li tapprofondixxi r-relazzjonijiet mal-klijenti, toħloq sorsi ġodda ta’ dħul, u ssaħħaħ ir-reżiljenza tagħna. Ninsab kuntent nirrapporta li l-2026 bdiet b’saħħitha, bid-dħul jikber b’madwar 11% fuq bażi annwali,” qal il-CFO ta’ GO plc, Reuben Attard.
Billi issa spiċċat l-aktar fażi intensa ta’ investiment fl-infrastruttura, l-investiment kapitali qed jiġi normalizzat, u l-bażi tad-dħul diversifikata qed tkompli tikber, GO qed tidħol fil-kapitlu li jmiss minn pożizzjoni ta’ saħħa konsiderevoli.
“Bnejna l-aqwa infrastruttura diġitali fil-gżira, GO hija waħda mid-ditti l-iżjed fdati f’Malta u għandna tim mimli talent u impenjat ħafna. L-aħjar ta’ GO għadu ġej,” temm jgħid Nikhil Patil.