Wednesday, April 2, 2025

Gzira United jissorprendu lil Hamrun Spartans

Aqra wkoll

Hamrun Spartans …0

Gzira United ………..1

Minn Cristian Muscat

F’kuntrast għal-logħba ta’ Floriana kontra Mosta, kienet partita li naqset milli tilħaq l-aspettattivi mixtieqa  dik li rat lil Gzira United jaħsdu lil Hamrun Spartans meta għelbuhom bl-iskor minimu ta’ 1-0.

Hamrun kellhom lil Ederson Bruno Domingos sospiż filwaqt li Emerson Marcelina, li qed jirkupra minn injury. Għalihom irritorna fl-azzjoni, il-Kroat Roko Prsa, wara li kien nieqes għal żmien twil fejn ġie utilizzat bħala sostitut tard fil-partita fejn ħa post Elionay Freitas Da Silva.

Kienu Hamrun li ħolqu l-ewwel periklu fl-20 minuta meta Joseph Mbong kellu xutt pjuttost fraġli minn tarf il-kaxxa salvat mingħajr wisq diffikultá mill-goalkeeper Taljan,  Giulio Mangano.

Fis-27 minuta, Hamrun kellhom ferħa bla temma meta Ra­phael Lopes Silva mill-viċin tefa’ ġewwa iżda r-referee Slobodan Petrovic iġġudika li l-Brażiljan kien mess il-ballun b’idu f’din l-azzjoni u għalhekk ħassar dan il-goal immedjatament. 

Iżda kontra x-xejra tal-logħob, fid-39 minuta, kienu l-Maroons li fetħu l-iskor meta s-sostitut THAYLOR ALDAMA li kien ilu biss żewġ minuti fil-ground, b’xutt mill-viċin ma ħafirx.

Il-pressjoni kienet kollha fuq il-Ħamruniżi fejn fit-tieni taqsima kellhom pussess territorjali ferm aħjar minn Gzira.

Fil-75 minuta resqu ferm viċin li jagħmlu l-iskor indaqs meta wara li rċieva minn azzjoni ta’ free-kick, il-Montenegrin Jovan Cadenovic minn pożizzjoni ideali ra lill-goalkeeper Gżirjan, Giulio Mangano, jsalva bi bravura.

Huma komplew bl-assedju fuq il-lasti avversarji u fil-ħin miżjud is-sostitut Mattias Ellul minn pożiz­zjoni ideali reġa’ ra lil Mangano jirriżulta bħala l-eroj fost sħabu hekk kif dawwar f’corner f’titjira spettakolari.

Madankollu, il-Maroons baqgħu kalmi u komplew jamministraw il-vantaġġ mi­nimu li kellhom sa tmiem il-partita, biex kisbu tliet punti prezzjużi.

HAMRUN S.: 1-Henry Bonello, 4-Steve Borg, 5-Sven Xerri, 7-Luke Montebello (29-Kairou Amoustapha 70), 8-Talison Lui Barboza (28-Redon Mihana 46), 10-Joseph Essien Mbong, 14-Elionay Freitas Da Silva (Roko Prsa 78), 20-Jovan Cadenovic, 33-Mayron (92-Cesar Menacho 59), 94-Ryan Camenzuli (3-Mattias Ellul 70), 99-Raphael Lopes Silva – Coach: Alessandro Zinnari

GZIRA U.: Giulio Mangano, 3-Gabriel Bohrer Mentz, 4-Joseph Minala, 5-Enrico Pepe, 14-Luis Carlos Riascos, 17-Montell Shaquill, 18-Diogo Barbosa (98-Jackson Mendoza 78), 20-Stefan Denic (7-Thaylor Aldama 37), 22-Kurt Zammit, 89-Nikola Disic, 93-Thiago Espindola – Coach: Giovanni Tedesco

REFEREE: Slobodan Petrovic

ASS. REFEREES: James Muscat, Shaun Calleja

RABA’ UFF: Fyodor Zammit

SKORER:T. Aldama 39 (GU)

AMMONITI: . Freitas Da Silva, Mayron, J. Cadenovic (HS)

Sport