Real Madrid kisbu rebħa komda ta’ 4-1 fuq ir-rivali tal-belt Rayo Vallecano fi Stadio Santiago Bernabeu u telgħu punti ndaqs ma’ Barcelona fil-quċċata ta’ La Liga.
Kylian Mbappe fetaħ l-iskor fl-14-il minuta minn penalty wara li Alvaro Carreras twaqqa’ fil-kaxxa. Tliet minuti wara, Mbappe reġa’ kien involut meta pprovda l-assist għal Carreras, li skorja t-tieni goal ta’ Real Madrid.
Għaxar minuti qabel il-mistrieħ, Jude Bellingham żied it-tielet goal wara azzjoni sabiħa li ntemmet b’pass ta’ Vinicius Junior. Mbappe kien viċin li jiskorja għal darb’oħra qabel il-mistrieħ, iżda x-xutt qawwi tiegħu laqat il-lasta.
Rayo Vallecano naqqsu d-distakk fil-bidu tat-tieni taqsima permezz ta’ Sergio Camello, iżda Real Madrid baqgħu jikkontrollaw il-logħba. Fil-ħin miżjud, Mbappe skorja t-tieni goal personali tiegħu b’xutt baxx u b’saħħtu lejn ir-rokna tax-xibka biex issiġilla r-rebħa.
Din kienet ir-raba’ rebħa ta’ Real Madrid fl-ewwel ħames logħbiet tal-kampjonat u l-14-il waħda tagħhom fl-aħħar 15-il partita f’darhom kontra Rayo Vallecano.
