Jomic Calleja kien ikkundanat ħames snin ħabs wara li nstab ħati li pprova jdaħħal f’Malta materjal splussiv u li assoċja ruħu ma’ persuni oħra biex jagħmel dan. Il-każ seħħ fit-28 t’Awwissu 2019 u fil-ġimgħat u x-xhur ta’ qabel.
Fil-Qorti ħarġu wkoll diversi messaġġi, li kisbu l-investigaturi, u li l-imputat kellu ma’ persuni oħra biex jikseb anke sustanzi velenużi li meta jitħalltu mal-ilma joqtlu lill-vittmi fi żmien ġimagħtejn.
Ġie spjegat ukoll li malli Calleja ma rnexxilux jikseb dawn it-tip ta’ sustanzi rrikorra għall-isplussivi. Ħareġ ukoll li l-imputat ipprova jixtri l-veleni mid-dark web, bl-investigaturi Maltin jiġu notifikati bit-tentattivi tiegħu minn servizzi sigrieti barranin.
Skambju ta’ messaġġi wrew li l-veleni li pprova jixtri Calleja kienu mmirati għal persuna li għandha tul ta’ bejn 165 u 175 ċentimetru u li jiżen bejn 55 u 65 kilogramma.
Fis-sentenza tagħha, il-Qorti preseduta mill-Maġistrat Donatella Frendo Dimech qalet li hi obbligata tqis l-impatt li reat simili mwettqa b’tant ħażen u malizzja jħallu fuq il-membri tas-soċjetà.
“Soċjetà li trid tiġi protetta minn persuni ferm perikolużi bħalma hu l-imputat u dan billi l-istess imputat jiġi inkarċerat mhux biss bit-tama li dan iż-żmien iservi għar-rijabilitazzjoni tiegħu iżda biex għall-inqas għal perjodu ta’ żmien is-soċjetà tista’ tieħu nifs u tħossha protetta mit-tentakoli infernali tiegħu,” qalet il-Maġistrat Frendo Dimech.
Il-Qorti kkunsidrat ukoll il-fatt li sal-lum għad mhix magħruf l-vittma intenzjonata tal-għemil kriminuż tal-imputat li baqa’ ma wera l-ebda rimors jew offra xi tip ta’ kollaborazzjoni biex tali persuna tiġi skansata mill-kundanna ta’ mewt li ilha destinata għaliha.
Minbarra s-sentenza ta’ ħames snin priġunerija, il-Qorti ordnat ukoll il-konfiska ta’ €51,000 li kien ħallas Calleja f’depożiti għall-ħelsien mill-arrest li kienu ngħataw fi proċeduri separati.
Il-Prosekuzzjoni tmexxiet mill-Ispettur Omar Zammit.
