Hamrun Spartans ….0
FC Ballkani …………2
Minn Cristian Muscat
Hamrun Spartans iddiżappuntaw bil-kbir meta fit-tieni leg tat-tieni round ta’ kwalifikazzjoni tal-UEFA Europa Conference League, sfaw megħluba f’pajjiżna minn FC Ballkani bl-iskor ta’ 2-0 biex sfaw eliminati bl-istess aggregate wara li fl-ewwel leg, li ntlagħab fil-Kosovo, spiċċaw fi draw ta’ 0-0.
B’hekk intemmet l-avventura taċ-champions Maltin fl-Ewropa meta l-aspettativi tagħhom kienu ferm għoljin.
Kienu Ballkani li ħarġu fuq l-offensiva u wara ħames minuti, Almir Kryeziu fetaħ beraħ lid-difiża Ħamruniza għadda tajjeb lejn Bernahrd Karrica li minn qagħda ideali xeħet barra.
Il-Kosovani baqgħu l-aħjar team u fis-17-il minuta, Kryeziu kellu konklużjoni pjuttost ċentrali li ġiet salvata bla tbatija mill-goalkeeper Henry Bonello.
Fl-20 minuta, l-Ispartans wieġbu għall-ewwel darbameta Juan Carlos Corbalan kellu xutt insidjuż mid-distanza devjat f’corner.
Tliet minuti wara, dawn tal-aħħar reġgħu ħolqu l- periklu meta Kryeziu kellu xutt mill-viċin imblukkat minn Mattias Ellul biex id-difensur Ħamruniż evita goal ċert hekk kif il-ballun deher destinat għal ġox-xibka.
Fil-31 minuta, il-coach Taljan tal-Ispartans, Alessandro Zinnari, kellu jeffettwa sostituzzjoni sfurzata minħabba li weġġa’ d-difensur Brażiljan, Emerson Marcelina, biex minfloku daħal Sven Xerri.
Tliet minuti wara, Hamrun heddew il-lasti avversarji iżda t-tentattiv ta’ Joseph Mbong intemm barra.
Fit-tieni taqsima, il-Kosovani ħarġu aktar avventurużi biex ifittxu l-goal tant importanti. U proprju fil-65 minuta għamlu dan meta minn clearance erratika ta’ Bonello, il-ballun spiċċa f’saqajn WALID HAMIDI li venven xutt mid-distanza li għeleb għal kollox lill-goalkeeper Ħamruniż.
Fid-69 minuta, Karrica spara xutt angolat li ħareġ l-aħjar ta’ Bonello li dawwar f’corner b’mod stupend biex ħalla lil Hamrun fil-logħba.
Iżda fil-75 minuta, Ballkani rebħu penalty meta l-ewwel xutt ta’ Queven Inacio ġie salvat parzjalment minn Bonello, biex mill-azzjoni li segwiet, Mayron Marques, waqqa’ lil Ismajlgeci fil-kaxxa. Mill-11-il metru BERNARD KARRICA xeħet lil Bonello fuq in-naħa opposta.
Dan il-penalty għalaq il-partita u ta l-kwalifikazzjoni lil FC Ballkani.
HAMRUN S.: 1-Henry Bonello, 28-Juan Carlos Corbalan, 91-Emerson Marcelina (5-Sven Xerri 31), 33-Mayron Marques (8-Talison 83), 10-Joseph Essien Mbong, 6-Daniel Letherby (77-Shaisen Attard 63), 14-Elionay Freitas da Silva (19-Vitao 73), 12-Roko Prsa, 3-Matthias Ellul, 99-Raphael Lopes, 7-Luke Montebello – Coach: Alessandro Zinnari
FC BALLKANI: 1-Enea Kolici, 4-Gentrit Halili, 20-Astrin Thaqi, 32-Bayram Josnaica, 3-Arber Ptoku, 88-Queven Inacio, 6-Lindon Emerilahu, 14-Marsel Ismajlgeci (99-Bleart Tolaj 79), 11-Walid Hamidi (22-Krenar Dulaj 88), 25-Bernard Karrica (37-Giovanni 82), 10-Almir Kryeziu (2-Geralb Smajli 88) – Coach: Ilir Daja
REFEREE: Michele Beltrano (San Marino)
ASS. REFEREES: Gian Marco Ercolani, Ernesto Cristiano (San Marino)
RABA’ UFF: Raffaele Delvecchio (Italja)
SKORERS: W. Hamidi 62, B. Karrica 74 (B)
AMMONITI: E. Freitas Da Silva, R. Prsa, M. Marques (HS)
