Birkirkara FC ġew imposti bi projbizzjoni fuq it-trasferimenti mill-korp governattiv dinji tal-futbol, il-FIFA, għat-tliet perjodi ta’ trasferimenti li jmiss.
Il-klabb tal-Malta Premier League ġie sanzjonat wara li tilef appell quddiem il-FIFA, fejn klabb mill-Ekwador talab kumpens għat-taħriġ (training compensation) fir-rigward tal-eks plejer ta’ Birkirkara, Luis Cordova.
Id-difensur Ekwadorjan ingħaqad mal-Istripes f’Jannar tal-2025 u qatta’ t-12-il xahar ta’ wara mal-klabb ta’ Birkirkara.
Skont il-proċedura normali, dak iż-żmien Cordova kien ġie reġistrat mal-Malta FA bħala plejer ta’ Kategorija 4; klassifikazzjoni li tiżgura li l-klabbs Maltin ma jkunux obbligati jħallsu kumpens għat-taħriġ lill-klabbs preċedenti tal-plejer.
Madankollu, wieħed mill-eks klabbs ta’ Cordova fl-Ekwador ressaq ilment quddiem il-FIFA, fejn sostna li kien intitolat għal kumpens għat-taħriġ mill-klabb Malti.
Wara s-seduta ta’ smigħ, il-bord tal-FIFA ddeċieda favur il-klabb Ekwadorjan u ordna li l-klabb Malti jħallas il-kumpens għat-taħriġ.
Huwa mifhum li s-somma dovuta minn Birkirkara hija ta’ madwar €20,000.
Peress li Birkirkara għadhom ma ħallsux l-ammont dovut lill-klabb Ekwadorjan, ġiet imposta fuqhom projbizzjoni fuq it-trasferimenti għat-tliet perjodi li jmiss, li tibda minn Jannar.
Intant, dan is-sit tkellem mal-president ta’ Birkirkara FC, Dr Chris Cardona , li tana dawn il-kummenti rigward dan il-każ:
“Hemm kumpens x’jingħata minħabba t-training compensation fee ta’ Cordova u jrid jitħallas biex it-transfer ban minn fuq il-FIFA titneħħa.”
