Il-Federazzjoni Maltija tal-Motorsport (MMF) tabilħaqq tapprezza li wara li pproponiet il-miżura għal tliet budgets konsekuttivi, ġiet introdotta road tax imnaqqsa ta’ 35% għal sewwieqa li jagħżlu li jużaw il-vetturi u l-muturi tagħhom biss fi tmiem il-ġimgħa u festi pubbliċi; miżura applikabbli għall-vetturi kollha rreġistrati ma’ Transport Malta.
Madankollu, l-MMF qalet li huwa diżappuntanti li wieħed jinnota li għalkemm l-allokazzjoni ta’ €11m biex ikunu iffokati fuq l-isport, l-ebda fondi ma tħabbru li se jiġu allokati għall-iżvilupp tal-motorsport. L-MMF u l-komunità tal-motorsport qalu li ma jistgħux ma jesprimux id-diżappunt għall-“falliment” tal-gvern talli naqas milli jagħti konsiderazzjoni xierqa lill-motorsport.
L-MMF ippreżentat bosta proposti lill-gvern, inkluż appoġġ għal kompetizzjonijiet internazzjonali, one-stop-shop għall-ħruġ ta’ permessi għal avvenimenti sportivi pubbliċi, assistenza finanzjarja għal klabbs tal-motorsport meta jorganizzaw avvenimenti lokali u l-iżvilupp ta’ Road Safety and Motorsport Facility, li hija wegħda elettorali tant mistennija.
L-MMF tinnota li għaddew seba’ snin u l-wegħda elettorali mtennija għall-iżvilupp ta’ faċilità tal-motorsport, li hija meħtieġa ħafna mill-komunità tal-motorsport, la tidher u lanqas tinstema’ waqt id-diskors tal-Budget. Fil-proposti tal-budget, l-MMG irrakkomandat li tingħata direzzjoni konċiża u ċara dawr din il-Faċilità, fejn in-nefqa kapitali kollha tiġi minn investiment privat.
Hija żiedet tgħid li mhux biss dawn il-proposti u l-wegħda elettorali ma ngħatawx l-importanza dovuta fid-diskors tal-baġit, iżda miżura interim biex talloka fondi biex l-atleti tal-motorsport lokali jkunu jistgħu jitħarrġu u jipprattikaw l-isport tagħhom f’postijiet barranin ġiet injorata wkoll.