Fl-ewwel reazzjoni tagħha għall-Baġit 2027, Żminijietna – Leħen ix-Xellug twissi li miżuri li jżidu l-għoli tal-ħajja u l-ispejjeż tax-xogħol għal ċittadini ta’ pajjiżi terzi (TCNs) jistgħu jwasslu biex dawn il-ħaddiema jitilqu minn Malta u jaggravaw in-nuqqas ta’ ħaddiema f’diversi setturi.
Żminijietna tiddikjara li t-trade unions se jkollhom jinnegozjaw pagi ogħla u kundizzjonijiet tax-xogħol aħjar sabiex il-ħaddiema jkunu jistgħu jlaħħqu maż-żieda fl-ispejjeż u jżommu livell ta’ għajxien diċenti. Min iħaddem għandu jagħraf ukoll li ż-żamma tal-ħaddiema teħtieġ pagi ġusti, dinjità u sigurtà.
It-TCNs jagħtu kontribut importanti lill-ekonomija Maltija u lis-servizzi essenzjali. Kull politika li żżid l-ispejjeż tagħhom mingħajr kumpens adegwat tista’ tolqot kemm lill-ħaddiema nfushom kif ukoll lis-setturi li jiddependu fuqhom.
Żminijietna tappella għal tisħiħ tan-negozjar kollettiv, żidiet ġusti fil-pagi u politiki li jipproteġu lill-ħaddiema kollha, irrispettivament min-nazzjonalità tagħhom.