Manchester United tal-Ingilterra u Juventus tal-Italja, il-clubs attwali u preċedenti ta’ Cristiano Ronaldo, it-tnejn sofrew telf finanzjarju qawwi għall-2020-21 hekk kif il-kriżi tal-coronavirus żvojta l-istadia tal-football Ewropej mill-partitarji.
Filwaqt li l-viċi president eżekuttiv, Ed Woodward, esprima fiduċja fl-irkupru tal-United hekk kif Old Trafford ospita folol ta’ kapaċità għall-ewwel darba fi kważi 18-il xahar, Juventus qalu li anke huma se jtemmu s-sena finanzjarja 2021-22 tagħhom, li xorta se tkun affettwata bil-kbir mill-pandemija, “b’telf sinifikanti”.
Woodward, li f’April qal li se jwarrab fl-aħħar tas-sena, irrifletta fuq l-ambjent diffiċli li fih joperaw anke l-akbar clubs.
“Filwaqt li aħna kunfidenti fis-saħħa relattiva tagħna, jibqa’ ċar li l-football kollu kemm hu se jiffaċċja sfidi finanzjarji kbar ikkawżati minn snin ta’ inflazzjoni materjali fil-pagi u t-tariffi tat-trasferimenti, aggravati mill-impatt tal-pandemija,” huwa qal f’konferenza telefonata ma’ analisti u investituri.
Il-United qed jistennew li l-pagi tagħhom se jogħlew b’20% din is-sena wara li saħħew l-iskwadra aktar billi ffirmaw lir-rebbieħ tat-Tazza tad-Dinja ma’ Franza, Raphael Varane, u l-winger tal-Ingilterra, Jadon Sancho.
Il-club ta’ Manchester, li ffirma lir-rebbieħ tal-Ballon d’Or għall-ħames darbiet, Cristiano Ronaldo, mingħand Juventus tal-Italja x-xahar li għadda, kellu telf nett għas-sena li ntemmet fit-30 ta’ Ġunju ta’ £92.2 miljuni, meta mqabbel ma’ telf ta’ £23.2 miljuni sena ilu. Iċ-ċifra ġiet minfuħa minn skoss qawwi tat-taxxa ta’ darba.
Ronaldo, ta’ 36 sena, ħalla mpatt immedjat fuq ir-ritorn fil-Premier League b’żewġ goals kontra Newcastle United.
Sadanittant, Juventus raw it-telf annwali tagħhom jirdoppja aktar mid-doppju għal rekord ta’ €209.9 miljuni fi staġun meta t-team ċeda l-kontroll tiegħu fuq it-titlu tas-Serie A.
Il-United, proprjetà tal-familja Glazer ibbażata fl-Amerika, u Juventus, it-tnejn attiraw kritika qawwija minn partitarji u regolaturi għall-involviment tagħhom fil-proġett tas-Super League Ewropew fallut aktar kmieni din is-sena.
Ishma fil-United, li ma pprovdewx gwida finanzjarja għas-sena sħiħa minħabba l-inċertezza tal-Covid-19, qalbu t-telf ta’ qabel is-suq biex jinnegozjaw sa 1.5% fil-Borża ta’ New York.
