Minn Cristian Muscat
Kif bdiet l-imħabba tiegħek lejn il-CrossFit?
Jien minn dejjem kont inħobb it-taħriġ, u tmien snin ilu ħbieb tiegħi introduċewni mal-crossfit u minn dakinhar ma ħaristx lura.
X’suċċessi maġġuri ksibt fil-karriera tiegħek sa issa f’dan l-isport li tant tħobb?
Ifhem, jien ħa nagħlaq 49 u nanna ta’ tifla ta’ sentejn. L-aħħar kompetizzjoni li dħalt għaliha kienet ir-Rookies League, fejn kont ma’ tim ta’ sitt atleti u ġejna t- tielet. Mhux xi waħda li nħobb nikkompeti, imma meta juru fiduċja fija ngħid għaliex le!
Kif tqis il-livell tal-CrossFit f’pajjiżna fil-preżent?
Naħseb li l-livell huwa għoli. Fil-fatt, kellna atleti li anke kkompetew barra minn xtutna u rebħu l-unuri, u nahseb li kulma jmur, dan l-isport iktar qed isir popolari.
U dak tar-riżorsi fejn titħarrġu u jkollkom il-kompetizzjonijiet tagħkom?
Bħala riżorsi naħseb li qegħdin tajjeb. Ifhem, dejjem ikun hemm lok fejn tista’ titjieb imma naħseb li l-gyms li hawn huma tajbin u attrezzati ħafna, u anke l-livell tal-kompetizzjonijiet li jorganizzaw huma ta’ livell għoli.
Kif qed tħares lejn il-futur tiegħek flil-CrossFit?
Ifhem, bħalma diġá għidtlek jien m’għadnix żgħira imma diment li tibqa’ tagħtini saħħti, il-CrossFit ma nibdlu ma’ xejn għax tiġi qisek familja, u s-sapport ta’ dawk li jittrenjaw miegħak jagħtini iktar saħħa.
Għaddi messaġġ finali lil min jixtieq jagħmel karriera ta’ suċċess fil-CrossFit.
Jien, il-CrossFit mhux biss jgħinni fiżikament imma anke mentalment. Huwa sport li jgħaqqad u meta ssir parti minn CF Gym bħalma diġá għidt, issib familja oħra!