Il-Fondazzjoni għas-Servizzi Mediċi (l-FMS), b’kollaborazzjoni mal-Isptar Mater Dei, tixtieq tinforma lill-pubbliku li daħlu fis-seħħ devjazzjonijiet temporanji fil-parkeġġ tal-Isptar Mater Dei, hekk kif bdiet il-ħidma ta’ kostruzzjoni tad-Dipartiment il-ġdid tal-Immaġini Mediċi—element ewlieni fil-proġett usa’ ta’ Estensjoni tal-Isptar Mater Dei.
Ix-xogħlijiet ta’ kostruzzjoni qed jiġu kkordinati b’mod li jiġi żgurat li s-servizzi kollha tal-isptar, inklużi appuntamenti skedati, jibqgħu għaddejjin bla interruzzjoni. Madankollu, il-pazjenti u l-viżitaturi huma ġentilment mitluba jippjanaw minn qabel u jħallu ftit iktar ħin għall-parkeġġ u għall-aċċess għall-isptar, peress li jista’ jkun hemm xi dewmien żgħir minħabba dawn id-devjazzjonijiet temporanji.
Id-Dipartiment il-ġdid tal-Immaġini Mediċi, li se jinfirex fuq żewġ sulari, se jsaħħaħ b’mod sinifikanti l-kapaċitajiet dijanjostiċi tal-isptar, billi joffri aċċess aktar mgħaġġel u effiċjenti għal scans u proċeduri oħra essenzjali tal-immaġini. Dan l-iżvilupp jagħmel parti minn investiment nazzjonali usa’ mmirat lejn il-modernizzazzjoni tal-infrastruttura tas-saħħa f’Malta, l-immodernizzar tal-esperjenza tal-pazjent, u t-tnaqqis fil-ħinijiet ta’ stennija.
Din l-inizjattiva tibni fuq proġetti oħra li ġew konklużi jew li għadhom għaddejjin bħala parti mill-Proġett ta’ Estensjoni tal-Isptar Mater Dei. Dawn jinkludu l-helipad li ġie inawgurat riċentement u li tejjeb b’mod sostanzjali r-rispons f’każijiet ta’ emerġenza, kif ukoll parkeġġ ġdid iddedikat għall-professjonisti tal-kura tas-saħħa fl-Isptar Mater Dei. Qed isiru wkoll xogħlijiet oħra sabiex l-isptar ikun ippreparat aħjar biex jaffaċċja d-domandi preżenti u futuri fil-qasam tas-saħħa.
Sabiex l-istaff, il-pazjenti, u l-viżitaturi jibqgħu infurmati b’dak kollu li jkun qed jiġri u b’kull tibdil temporanju li jista’ jaffettwahom, tnieda WhatsApp Channel apposta bl-isem “MDH Projects by FMS” (link: https://www.whatsapp.com/channel/0029VbAFgvK3LdQMBMgCmX0L ). Permezz ta’ dan il-mezz, ser jiġu komunikati aġġornamenti f’ħin reali, avviżi, u mumenti importanti ta’ progress direttament mas-segwaċi.
Il-pubbliku huwa mħeġġeġ isegwi s-sinjali fuq il-post u jikkopera mal-persunal tas-sigurtà tal-isptar, li se jkun preżenti biex jiggwida u jassisti f’dan il-perjodu.
L-FMS u l-Isptar Mater Dei jirringrazzjaw lill-pubbliku tal-kooperazzjoni u l-appoġġ kontinwu tagħhom hekk kif inkomplu naħdmu biex nipprovdu faċilitajiet tas-saħħa ta’ livell għoli u li jilqgħu għall-bżonnijiet ta’ pajjiżna.
