Il-holders MFPA bdew l-impenji tagħhom fid-David Cluett Memorial Cup bl-aqwa mod possibbli meta għelbu lit-tim il-ġdid ta’ Floriana Veterans 6-2.
Is-solitu Aleksandar Ribic kien awtur ta’ doppjetta personali filwaqt li George Frendo, Julian Galea, Thomas Paris u Jonathan Bondin żiedu aktar gowls għall-Malta Football Players Association.
Il-Furjaniżi kellhom lil Gilbert Scerri li skorja doppjetta personali.
Rabat kisbu rebħa tajba ta’ 6-2 fuq Żejtun Red Stars sabiex għaddew għall-fażi tal-aħħar erbgħa ta’ din il-kompetizzjoni.
Protagonisti għar-Rabtin kienu l-akkwist il-ġdid Melvin Borg, Ibrahim Tarek u Timothy Zammit li skorjaw doppjetta kull wieħed.
Żejtun Red Stars naqqsu l-marġni tal-iskor b’doppjetta ta’ Noel Tabone.
Gżira United irreġistraw l-ikbar rebħa tal-ġurnata wara skor ta’ 11-1 kontra Hibernians.
Jean Pierre Mifsud Triganza kien il-protagonista għall-Maroons meta skorja erba’ gowls, b’Ian Zammit jiskorja tripletta. Arthur Oyama kien awtur ta’ doppjetta filwaqt li Kevin Sammut u Daniel Mariano Bueno għaqqdu l-iskor għat-tim tagħhom.
Ilia Nazarov skorja l-uniku gowl għall-Pawlisti.
Tliet gowls ta’ Firaz Aboulezz u gowl ieħor ta’ Bojan Kaljevic kienu biżżejjed għal Birkirkara St Helen’s sabiex jirbħu lil Żurrieq Wolves 4-1. Għal dawn tal-aħħar Kevin Vella naqqas il-marġni tal-iskor.