Il-Kumitat Olimpiku Malti ħabbar il-ħames atleti li qed jippreparaw għal-Logħob Olimpiku ta’ Pariġi 2024 u li ser jibbenefikaw minn għajnuna finanzjarja permezz tal-Olympic Solidarity.
Bl-appoġġ tal-Kumitat Olimpiku Internazzjonali (IOC), il-finanzjament tal-Olympic Solidarity għandu l-għan li joffri assistenza lill-Kumitati Olimpiċi Nazzjonali (NOCs) kollha biex jappoġġjaw l-iżvilupp tal-isport u jrawmu aktar atleti b’potenzjal.
Il-ħames atleti mgħazula huma Jordan Gusman (Atletika), Jeremy Zammit (Atletika), Matthew Abela (Badminton), Eleanor Bezzina (Sparar) u Sasha Gatt (Għawm).
Abela, Bezzina u Gatt diġà ħadu sehem f’mill-inqas edizzjoni waħda tal-Logħob Olimpiku.
L-għażla kienet ibbażata fuq il-prestazzjonijiet tas-sentejn li għaddew u l-prospett realistiku tagħhom ta’ kwalifikazzjoni għal-Logħob.
“Il-boroż ta’ studju individwali jagħtu lill-kumitati Olimpiċi il-possibbiltà li jiksbu għajnuna finanzjarja u teknika għal numru limitat ta’ atleti elite li qed jitħarrġu, u jippruvaw jikkwalifikaw għal-Logħob Olimpiku ta’ Pariġi 2024” spjegat Charlene Attard, Direttur tal-Isport, Kumitat Olimpiku Malti.
Il-finanzjament se jintefaq fuq aċċess għal faċilitajiet ta’ taħriġ, assistenza u monitoraġġ medika u xjentifika regolari kif ukoll spejjeż tal-ivvjaġġar għall-atleta biex jipparteċipa f’kompetizzjonijiet, inklużi avvenimenti ta’ kwalifika Olimpika.
