Fil-Kampjonat Spanjol, Barcelona approfittaw mit-telfa ta’ Real Madrid kontra Mallorca (1-0) biex fetħu tmien punti vantaġġ fil-quċċata tal-klassifika b’rebħa impressjonanti ta’ 3-0 fuq Sevilla.
Din ir-rebħa kienet l-10 waħda tagħhom fl-aħħar 11-il partita filwaqt li l-Katalani issa huma bla telfa fi 15-il partita fil-kompetizzjonijiet kollha.
Peró din il-partita ma kellhiex bidu tajjeb minħabba li Barcelona tilfu lil Sergio Busquets minħabba li sofra injury wara biss erba’ minuti biex Franck Kessie kellu jidħol fil-post tiegħu.
Wara taqsima mingħajr goals, it-team immexxi minn Xavi Hernandez skorja tliet darbiet mingħajr risposta.
Kien Jordi Alba (58) li fetaħ l-iskor meta kkonkluda mill-assist ta’ Kessie.
Fis-70 minuta, huma rduppjaw meta Gavi kompla l-ballun għal ġewwa wara xogħol tajjeb ta’ Raphinha.
Disa’ minuti wara, l-istess Raphinha (li kien qed jilgħab fl-assenza tal-imweġġa’ Ousmane Dembele) inkuruna l-wirja tiegħu billi ssiġilla r-rebħa meta sammar il-ballun fix-xibka mill-cross ta’ Alba.
