Il-Malta FA tilqa’ t-tħabbira, fid-diskors tal-Baġit 2027, ta’ 10 ijiem ta’ sports leave imħallas għall-atleti li jirrappreżentaw lil Malta f’Kampjonati Ewropej u Dinjija
Il-Malta FA laqgħet it-tħabbira, fid-diskors tal-Baġit 2027, ta’ 10 ijiem ta’ sports leave imħallas għall-atleti li jirrappreżentaw lil Malta f’Kampjonati Ewropej u Dinjija, kif ukoll għall-membri tat-timijiet tekniċi u mediċi li jakkumpanjawhom.
L-introduzzjoni ta’ dan il-leave sportiv ġiet proposta mill-Malta FA, li ilha żmien twil tħeġġeġ għal miżura li tippermetti lill-plejers tat-timijiet nazzjonali u lill-istaff ta’ appoġġ iwettqu l-impenji internazzjonali tagħhom mingħajr ma jkollhom jużaw il-leave personali tagħhom.
L-Assoċjazzjoni temmen li din il-miżura hija pass pożittiv biex jiġu appoġġjati l-atleti u l-istaff li jgħaqqdu l-isport tal-ogħla livell ma’ impjieg full-time, u li dan se jgħinhom ikomplu jiżviluppaw aktar fl-ogħla livell possibbli. Il-Malta FA tħares ’il quddiem biex taħdem mal-awtoritajiet rilevanti fuq l-implimentazzjoni ta’ din il-miżura.
F’dawn l-aħħar snin, il-Malta FA ħadmet mill-qrib mal-Gvern u l-awtoritajiet tiegħu fuq proġetti u inizjattivi siewja biex jinkoraġġixxu lill-isportivi. Nieħdu pjaċir naraw li dan ix-xogħol se jkompli. Permezz tal-allokazzjoni finanzjarja b’saħħitha għas-settur sportiv, aħna kunfidenti li nistgħu nkomplu naħdmu flimkien fuq proġetti li jgħollu l-livell tal-logħba f’pajjiżna.
