Il-Ministru għall-Edukazzjoni u l-Isport, Byron Camilleri, ħabbar li l-Matthew Micallef St John Stadium fil-Marsa mistenni jkollu tribuna għall-ispettaturi u trakka tal-warm-up, it-tnejn li huma mgħottija – titjib li ilu mistenni.
Bħalissa għaddejjin xogħlijiet minn Athletics Malta, iffinanzjati mill-Ministeru, biex titjieb il-korsija tal-ġiri fil-Kumpless Sportiv tal-Marsa; filwaqt li x-xogħlijiet biex jiġu mgħottija t-tribuna prinċipali u t-trakka tal-warm-up huma skedati għall-2027, flimkien mal-installazzjoni ta’ postijiet ġodda għall-udjenza.
Din l-aħbar tasal wara li Camilleri ħabbar skema ġdida ta’ appoġġ għas-saħħa mentali u l-benesseri tal-atleti. Din l-iskema toffri assistenza finanzjarja lill-atleti li jkunu sofrew korrimenti fit-tul – jew korrimenti li wasslu biex itemmu l-karriera tagħhom – sabiex ikunu jistgħu jaċċessaw servizzi psikoloġiċi professjonali, pariri (counselling) u forom oħra ta’ appoġġ għall-benesseri.
