Il-Ministru għall-Edukazzjoni u l-Isport, Byron Camilleri ħabbar l-introduzzjoni ta’ Skema ġdida ta’ Appoġġ għas-Saħħa Mentali u l-Benesseri tal-Atleti, immirata biex tipprovdi assistenza dedikata lill-atleti li sofrew korrimenti fit-tul jew li temmew il-karriera tagħhom.
L-inizjattiva tirrikonoxxi l-isfidi psikoloġiċi u emozzjonali li jiffaċċjaw l-atleti li l-karrieri sportivi tagħhom jiġu mfixkla jew jintemmu ħesrem minħabba korriment.
Waqt it-tħabbira, il-Ministru Camilleri enfasizza l-impatt profond li korrimenti serji jista’ jkollhom fuq l-atleti, partikolarment dawk li ddedikaw snin minn ħajjithom biex isegwu l-ambizzjonijiet sportivi tagħhom.
Ilkoll għandna passjoni fil-ħajja. Immaġina li jgħidulek li, minn mument għall-ieħor, ma tistax tkompli ssegwi dik il-passjoni. Din hija realtà li kull atleta jirriskja li jiffaċċja. Moviment ħażin wieħed jew korriment serju wieħed jista’ jġib snin ta’ dedikazzjoni, sagrifiċċju u ambizzjoni fi tmiem ħesrem.
Permezz ta’ din l-iskema, atleti li sofrew korrimenti fit-tul jew li temmew il-karriera tagħhom se jkunu eliġibbli biex japplikaw għal assistenza finanzjarja biex jaċċessaw servizzi psikoloġiċi professjonali, konsulenza u appoġġ ieħor għall-benessri.
Din l-iskema se sservi wkoll bħala inizjattiva ta’ sensibilizzazzjoni, li tħeġġeġ rikonoxximent akbar tas-saħħa mentali u l-benesseri emozzjonali bħala komponenti essenzjali tal-benesseri tal-atleti.
L-introduzzjoni ta’ din l-iskema tirrifletti impenn usa’ għat-tisħiħ tal-istrutturi ta’ appoġġ fis-settur sportiv, li jiżgura li l-atleti mhux biss ikunu appoġġjati matul il-karrieri sportivi tagħhom iżda wkoll matul it-tranżizzjonijiet diffiċli li jistgħu jsegwu korrimenti serji.
