Il-Partit Laburista jilqa’ b’sodisfazzjon il-pjan ‘Malta in Motion’, pjan ħolistiku ppreżentat mill-Ministru għat-Trasport, Infrastruttura u x-Xogħlijiet Pubbliċi, Chris Bonett li se jagħti lin-nies aktar għażliet effiċjenti kif jivjaġġaw minn post għall-ieħor filwaqt li tissaħħaħ il-konnettivita’ bejn komunitajiet ewlenin, żoni ta’ impjiegi u servizzi.
Pjan li jibni fuq – u li jkompli jtejjeb – dak li kien tħabbar iktar kmieni.
Pjan li ħa ż-żmien li kellu bżonn biex jiġi definit u li hu wieħed li jista jitwettaq.
‘Malta in Motion’, li inħadem minn Transport Malta mad-ditta internazzjonali ARUP jiġbor fih 6 elementi ewlenin li se jiġu inkorporati flimkien. Dawn huma Tallinja, Tallinja bil-baħar, il-karozzi u t-toroq, il-mixi u r-roti u sistema ta’ Rapid Transit jew Light Rail.
Dan ifisser li mod wieħed ta’ trasport se jkun magħqud mal-ieħor bħala katina u li twassal għal trasport tal-massa li jagħmel sens għar-realtajiet tal-lum u ta’ għada.
Il-ħsieb strateġiku ta’ Malta in Motion huwa msejjes fuq ħames pilastri li jagħtu prijorita’ lin-nies, spazji u opportunitajiet ekonomiċi:
• L-għażla ta’ kif persuna tivvjaġġa
• Kif tgħix aħjar b’sistema effiċjenti ta’ trasport
• Trasport li jirrispetta l-eżiġenzi ta’ kulħadd
• Sistema integrata u konnessa fejn is-servizz ikun sinkronizzat
• Pjan robust li jassigura s-soluzzjonijiet mhux biss għal-lum imma anke għall-futur.
Dan il-pjan fuq medda ta’ snin se jwassalna għall-għanijiet varji: li jkollna pajjiż aktar organizzat, trasport li jiflaħ għall-bżonnijiet tal-futur, aktar inklussiv, sigur u fuq kollox effiċjenti.
