Saturday, July 20, 2024

Il-PM Abela f’Laqgħa Informali tal-Kunsill Ewropew fi Brussell li bdiet id-diskussjonijiet dwar tmexxija futura tal-UE

Aqra wkoll

Fil-bidu ta’ Laqgħa Informali għall-Mexxejja Ewropej fi Brussell, li fiha bdew id-diskussjonijiet għat-tmexxija futura tal-Unjoni Ewropea, il-Prim Ministru Robert Abela tkellem dwar Ewropa li tindirizza l-prijoritajiet taċ-ċittadini kollha tal-Unjoni Ewropea.

F’din il-laqgħa l-Mexxejja Ewropej bdew jiddiskutu ċ-ċiklu istituzzjonali li jmiss wara l-elezzjonijiet tal-Parlament Ewropew. Fil-fatt id-diskussjoni, li mistennija tkompli tiżviluppa f’laqgħa oħra tal-Kunsill Ewropew lejn tmiem il-ġimgħa d-dieħla, daret dwar min se jokkupa l-ogħla karigi fl-Unjoni Ewropea fosthom il-ħatra ta’ President tal-Kunsill Ewropew u n-nomina ta’ President tal-Kummissjoni Ewropea.

F’kummenti mal-midja fil-bidu ta’ din il-laqgħa tal-Kunsill Ewropew, il-Prim Ministru Robert Abela mhux biss fisser l-importanza tal-laqgħa iżda nnota li minkejja li l-Mexxejja jappartjenu lejn gruppi politiċi differenti, għandu jkun hemm diskussjoni miftuħa f’dawk li huma l-valuri li għalihom inħolqot l-Unjoni Ewropea. “Nemmen li anki l-Unjoni Ewropea ta’ għada għandha tkun dik li tkompli tirrappreżenta valuri importanti bħal dak tas-soċjal”, saħaq Dr Abela. 

Qal li fil-laqgħa għandha ssir analiżi tal-elezzjonijiet Ewropej u l-messaġġi li bagħtu l-popli Ewropej, inkluż dak Malti, li għalkemm ta fiduċja lill-Gvern Malti, irid li jiġu indirizzati aħjar il-prijoritajiet tiegħu. Hawn semma li dan kollu qed isir f’kuntest ta’ sfidi li jibqgħu kurrenti f’Ewropa li qed tara żewġ gwerer fuq l-għatba u l-isfida tal-inflazzjoni, li għandha tkompli tiġi indirizzata.

Il-Prim Ministru qal li Malta hija Stat Membru kburi fl-Unjoni Ewropea li trid tkompli timbotta valuri oħra importanti bħal dawk favur il-ġustizzja u l-governanza flimkien ma’ prinċipji oħra bħal dak tas-Suq Waħdieni, li jaħdem b’mod ugwali għal kulħadd fosthom fl-aċċess għall-mediċini, inkluż għal pajjiżi bħal Malta, li l-qagħda ġeografika tagħha tagħmilha fil-periferija tal-Ewropa.

Ekonomija

Sport