- leħen akbar liċ-ċittadin
- aktar infurzar fis-settur tal-kostruzzjoni
- sas-sajf se jkollna liġi ġdida tal-OHSA
- se titneħħa kull distinzjoni bejn bini stand-alone u bini ieħor
- il-Gvern se jordna audit tal-proċessi ta’ allokazzjoni ta’ art biex jaġġorna fejn meħtieġ
Ftit sigħat biss wara li ppubblika r-rapport tal-inkjesta dwar il-mewt ta’ Jean Paul Sofia, il-Prim Ministru Robert Abela ħabbar ħames inizjattivi li l-Gvern beda jwettaq u huma ta’ prijorità immedjata. Dan sabiex ikompli jirriforma s-settur tal-kostruzzjoni.
F’konferenza tal-aħbarijiet li indirizza fil-Berġa ta’ Kastilja, il-Prim Ministru qal li se jingħata leħen akbar liċ-ċittadin b’sistemi aħjar u aktar aċċessibbli biex l-argument taċ-ċittadini fuq nuqqas ta’ osservanza ta’ regoli jasal b’mod effikaċi.
Għalhekk il-Gvern se jipprovdi assistenza professjonali ta’ Avukati u Periti lil dawn iċ-ċittadini. Il-Kummissarju għall-Ambjent u l-Ippjanar fi ħdan l-Uffiċċju tal-Ombudsman ikollu wkoll il-mandat tiegħu aktar estiż għall-kostruzzjoni.
L-infurzar irid ikompli jintensifika b’taqsima ċentralizzata li tissorvelja l-infurzar fis-settur. Id f’id ma’ dan se jinħoloq helpline ffukat fuq il-qasam. Dan filwaqt li sas-sajf se jkollna liġi ġdida tal-OHSA li tirriforma l-aspett tas-saħħa u s-sigurtà.
Il-Prim Ministru spjega wkoll li fil-ġimgħat li ġejjin se titneħħa kull distinzjoni bejn bini stand-alone u bini ieħor. L-ewwel azzjonijiet b’rabta ma’ dan diġà tħabbar fl-aħħar jiem.
Dr Abela żied jgħid li minkejja li l-inkjesta qalet li ma hemmx rabta bejn l-allokazzjoni tal-art u l-inċident li seħħ f’Kordin, il-Gvern ħa nota tal-kritika dwar kif saret l-allokazzjoni u se jordna audit tal-proċessi ta’ allokazzjoni tal-art biex jaġġorna fejn meħtieġ.
Sadanittant, il-Prim Ministru ħabbar ukoll li ħatar sotto-kumitat tal-Kabinett ikkordinat mill-Kap tas-Segretarjat tal-Uffiċċju tal-Prim Ministru Glen Micallef biex imexxi b’mod iffukat l-implimentazzjoni tar-rakkomandazzjonijiet li joħorġu mill-istess inkjesta
