Il-Prim Ministru Iżrealit Yair Lapid feraħ lil Benjamin Netanyahu għar-rebħa tiegħu fl-elezzjoni ġenerali tat-Tlieta.
Il-partit Likud ta’ Netanyahu u l-alleati tal-lemin estrem u reliġjużi tiegħu rebħu 64 mill-120 siġġu fil-parlament, skont ir-riżultati finali maħruġa l-Ħamis.
Ir-riżultat itemm ukoll perjodu ta’ staġnar politiku bla preċedent li beda fl-2019, meta s-Sur Netanyahu ġie akkużat b’tixħim, frodi u ksur ta’ fiduċja, li huwa jiċħad. Huwa għadu għaddej ġuri, bis-seduta li jmiss tkun nhar it-Tnejn li ġej.
Wara li l-exit polls ipproġettaw li kien se jikseb il-maġġoranza, is-Sur Netanyahu qal lill-partitarji tal-Likud li kien se jwaqqaf Gvern li “jieħu ħsieb liċ-ċittadini kollha ta’ Iżrael, mingħajr eċċezzjoni, għax l-istat huwa tagħna lkoll”.
“Se nerġgħu nsibu s-sigurtà, naħdmu biex innaqqsu l-għoli tal-ħajja, inwessgħu aktar iċ-ċirku tal-paċi, nirrestawraw Iżrael bħala qawwa li qed tiżdied fost in-nazzjonijiet,” qal Netanyahu.
