Għall-partita ta’ ħbiberija li se tintlagħab illum bejn Malta u Azerbaijan, fl-Istadium Nazzjonali, il-bieraħ ġiet organizzata konferenza tal-aħbarijiet li saret fis-sala tal-konferenzi tal-istess Stadium Nazzjonali.
L-ewwel kelliem kien il-coach nazzjonali, Devis Mangia, li kien kien ferm pożittiv fil-kummenti tiegħu fejn sostna li għandu fiduċja assoluta fil-players tiegħu u jemmen li kapaċi jagħtu wirja kif mixtieqa filwaqt li jinkiseb ukoll riżultat pożittiv kontra l-avversarji tal-lum.
Huwa rrimarka wkoll b’ċerta insistenza li nnota ċerta differenza fil-livell u l-intensitá tal-players Maltin li jilagħbu barra minn xtutna għal dawk li qed jilagħbu f’pajjiżna u saħaq li għalhekk hemm lok għal titjib speċjalment fil-fiżika ta’ dawk il-players li jilagħbu fil-Kampjonat Premier.
Fir-rigward tal-players disponibbli għall-partita tal-lum huwa qal li Cain Attard biss se jkun indispost minħabba li ma jinsabx fl-aqwa kundizzjoni possibbli.
Dan filwaqt li teżisti wkoll possibbiltá li l-player James Brown, li jilgħab ma’ St Johnstone fil-Premiership Skoċċiż, jingħata d-debutt bil-flokk nazzjonali.
Barra minn hekk, huwa kellu kliem ta’ tifħir għall-coach ta’ Azerbaijan, il-kompatrijott Taljan, Gianni De Biasi, li qal li l-karriera tiegħu ta’ coach titkellem waħedha hekk kif kiseb suċċess kemm fis-Serie A kif ukoll fuq bażi ta’ team nazzjonali mal-Albanija fejn wassalhom sal-finali tal-Kampjonat Ewropew tal-2016.
It-tieni kelliem kien l-ex player ta’ Hamrun Spartans li f’Jannar li għadda ngħaqad ma’ AC Siena li jilagħbu fis-Serie C (B) fl-Italja, Matthew Guillaumier.
Huwa tenna li qed ikollu staġun pożittiv ma’ Siena bil-futur għal dan il-club jidher li huwa wieħed sabiħ.
Fir-rigward tal-logħba tal-lum qal li jemmen fi prestazzjoni pożittiva fejn faħħar l-istili u l-metodi tattiċi tal-coach Mangia u fuq kollox l-ambjent bejn il-players huwa wieħed san għall-aħħar.
Intant l-iskwadra tat-team nazzjonali hija:
Goalkeepers: Henry Bonello (Hamrun S); Matthew Calleja Cremona (Hibernians); Jake Galea (Balzan)
Difensuri: Enrico Pepe (Birkirkara); Andrei Agius Ferdinando Apap (Hibernians); Steve Borg, Karl Micallef (Hamrun S.); Zach Muscat (Casa Pia – Portugall); James Brown (St. Johnstone – Skozja); Jean Borg, Triston Caruana (Valletta);
Midfielders: Cain Attard (Birkirkara); Ryan Camenzuli, Brandon Diego Paiber, Adam Magri Overend (Floriana); Nikolai Muscat, Steven Pisani, Nevin Portelli (Gzira U.); Joseph Mbong (Hamrun S); Dunstan Vella (Hibernians); Teddy Teuma (St Gilloise – Belġju); Matthew Guillaumier (Siena – Italja);
Attakkanti: Paul Mbong, Luke Montebello (Birkirkara); Jan Busuttil (Floriana); Jurgen Degabriele, Jake Grech (Hibernians); Alexander Satariano (US Pergolettese – Italja)
Il-partita se tintwera diretta fuq TVM News+, fis-7.00 pm.
