Patri Dinjunisju Mintoff, ir-reliġjuż Malti li jaħdem qatigħ biex jgħin l-aktar persuni vunerabbli b’mod partikolari l-immigranti li jiġu f’pajjiżna, illum jiċċelebra għeluq sninu fejn jilħaq l-età sabiħa ta’ 94 sena. Għal din l-okkażjoni llejla fis-6.00 p.m. se ssir quddiesa ta’ ringrazzjament segwita minn riċeviment żgħir f’Ħal Far.
Din iċ-ċelebrazzjoni se ssir fil-Laboratorju tal-Paċi fejn fih jilqa’ proprju immigranti fil-bżonn biex jgħixu miegħu. Meqjus minn bosta bħala l-Appostlu ta’ Ġesù ta’ żminijietna, Patri Dijonisju Mintoff ġie ordnat saċerdot fl-1995. Huwa l-fundatur tal-Laboratorju tal-Paċi u ilu jmexxih minn Marzu tal-1971. Dan ilpatri tul is-snin b’kuraġġ u determinazzjoni qatt ma qata’ qalbu milli jkompli f’ħidmietu b’umiltà minkejja li fi triqtu ġieli sab xkiel.
Dan għax fil-bniedem, huwa min huwa, Patri Dijunisju Mintoff jara opportunità ta’ mħabba u fratellanza. Fl-2019 huwa rebaħ il-Premju tal-Anzjanità Attiva u f’April tal-istess sena huwa kien saħansitra nnominat għall-Premju tal-Paċi tal- UNESCO. Ħeġġa biex ikompli jgħin lill-aktar vulnerabbli Minkejja l-età avvanzata tiegħu Patri Dijunisju Mintoff għadu mimli ħeġġa biex ikompli l-missjoni tiegħu biex jgħin lill-batut, lill-fqir u lill-immigranti f’Malta.
Dan jagħmlu wkoll bl-għajnuna tal-kollaboraturi tad-Djoċesi. Xempju ta’ mħabba lejn ilproxxmu, Patri Dijonisju Mintoff irċieva kliem ta’ tifħir mill-Papa Franġisku fl-aħħar żjara tiegħu. Fil-fatt, fl-aħħar intervista li għamilnielu meta s-Santità Tiegħu kien rikoverat fl-Isptar Gemelli f’Ruma f’qgħada kritika, Patri Dijunisju Mintoff qalilna kemm il-Papa japprezza x-xogħol li jagħmel. Minbarra hekk, il-Papa Franġisku rrikonoxxa bil-kbir ħidmet Dijunisju mal-immigranti fejn qallu li fil-Laboratorju tal-Paċi li jmexxi, ħass “arja nadifa ħafna… teżor kbir għax hawn mhawnx qalb maqsuma imma hawn qalb sħiħa”.
Il-Papa Franġisku f’din l-okkażjoni kien qallu wkoll kliem li qatt mhuwa se jinsa – il-kliem, “li biex tkisser qalb ma tridx ħafna imma biex tkabbarha trid ħafna. Hawn il-Papa kien żied li fil-Laboratorju tal-Paċi li jmexxi “qed tinbena din il-ħaġa”. Lill-Patri Dijunisju Mintoff jixraqlu tassew dan ilkliem sabiħ u ta’ inkoraġġiment. Aħna minn hawn nawgurawlu l-isbaħ xewqat għal għeluq sninu kif ukoll nirringrazzjawh għax-xogħol kollu siewi li jagħmel mal-proxxmu.