Tnejn u tletin proġett artistiku u teatrali se jirċievu investiment b’total ta’ €1.24 miljun permezz tal-iskemi ta’ finanzjament mill-Ministeru għall-Arti, il-Kultura u l-Wirt Nazzjonali, permezz tal-Kunsill Malti għall-Arti. Total ta’ 23 applikant li għaddew l-istadji kollha b’suċċess se jirċievu €800,000 f’appoġġ permezz tal-Iskema tal-Appoġġ għall-Arti, u disgħa applikanti oħrajn se jirċievu €440,000 permezz tal-Iskema ta’ Appoġġ għall-Produzzjonijiet Teatrali li tnediet riċentament.
Iż-żewġ skemi għandhom l-għan li jappoġġjaw l-iżvilupp u l-preżentazzjoni ta’ xogħol artistiku ta’ kwalità għolja filwaqt li jsaħħu l-aċċess tal-pubbliku għal esperjenzi kulturali diversi, u għal inizjattivi li jtejbu l-aċċess għall-arti.
L-Iskema ta’ Appoġġ għall-Arti tgħin biex tbiddel l-ideat artistiċi fi proġetti kompluti filwaqt li tappoġġja l-ħolqien u l-preżentazzjoni tax-xogħol, tal-ipprogrammar kulturali, id-dokumentazzjoni, proġetti bbażati fil-komunità u miżuri li jagħmlu l-arti iżjed aċċessibbli.
L-Iskema ta’ Appoġġ għall-Produzzjonijiet Teatrali ġiet introdotta din is-sena u toffri finanzjament għar-riċerka, l-iżvilupp u l-produzzjoni ta’ xogħol teatrali ġdid u oriġinali. L-iskema tappoġġja lill-produtturi ta’ xogħlijiet teatrali tul il-proċess kreattiv, mir-riċerka tal-bidu sal-produzzjoni, il-preżentazzjoni u l-involviment tal-udjenza.
Waqt li ħabbar ir-riżultati, il-Ministru għall-Arti, il-Kultura u l-Wirt Nazzjonali, Malcolm Paul Agius Galea qal li dan l-investiment jirrifletti l-importanza nazzjonali li qed tingħata lill-kultura. “Bħalma ġie stabbilit fil-Viżjoni Malta 2050, aħna nqisu l-kultura bħala xi ħaġa essenzjali għall-identità nazzjonali tagħna u għat-tip ta’ soċjetà li nixtiequ nkomplu nibnu. Dan l-investiment se jagħti 32 proġett ir-riżorsi li jeħtieġu biex jiżviluppaw, biex jilħqu lill-udjenzi u biex jikkontribwixxu għall-ħajja kulturali ta’ Malta. Jirrifletti wkoll l-impenn tal-Gvern li jqiegħed il-kultura fiċ-ċentru tal-iżvilupp nazzjonali billi jinvesti b’mod dirett fl-artisti, fil-professjonisti kulturali u fl-organizzazzjonijiet li jsostnu s-settur. Dawn il-miżuri jgħinuna noħolqu iktar opportunitajiet biex ikun hemm iktar xogħol artistiku filwaqt li nsaħħu l-aċċess pubbliku għal esperjenzi kulturali diversi.”
Dr Luke Dalli, Chair Eżekuttiv tal-Kunsill Malti għall-Arti, qal, “Dan l-investiment jirrifletti l-impenn kontinwu tagħna biex noħolqu opportunitajiet iktar ċari u mmirati għall-artisti, l-organizzazzjonijiet kulturali u l-professjonisti kreattivi. Ir-rispons b’saħħtu għaż-żewġ skemi wera kemm hawn talent u potenzjal fis-setturi kulturali u kreattivi ta’ Malta. Permezz ta’ dawn iż-żewġ skemi ta’ finanzjament li jikkumplimentaw lil xulxin, qed ninvestu mhux biss fi proġetti artistiċi u teatrali kompluti iżda wkoll fil-proċessi kreattivi, fl-esperimentazzjoni u l-kollaborazzjoni li jagħmlu dan ix-xogħol possibbli. Iżjed importanti minn hekk, dan l-investiment isaħħaħ il-kapaċità tas-settur biex joħloq xogħol ta’ siwi u jintroduċi esperjenzi kulturali ġodda għall-udjenzi u l-komunitajiet f’Malta.”
Iż-żewġ skemi jagħmlu parti minn struttura ta’ finanzjament riveduta li ġiet introdotta fl-2026 mill-Kunsill Malti għall-Arti. L-Iskema ta’ Appoġġ għall-Produzzjonijiet Teatrali ġiet stabbilita bħala skema unika biex tiddistingwi appoġġ għal produzzjonijiet teatrali ġodda u oriġinali mill-firxa usa’ ta’ attività artistika eliġibbli taħt is-Skema tal-Appoġġ għall-Arti. Il-prinċipji tad-Dritt għall-Kultura jibqgħu inkorporati fiż-żewġ skemi u fil-portafoll ta’ finanzjament usa’ tal-Kunsill Malti għall-Arti. Dan l-investiment jallinja wkoll mal-Istrateġija 2030 tal-Kunsill Malti għall-Arti billi jappoġġja l-potenzjal kreattiv, l-eċċellenza artistika, il-prattika professjonali sostenibbli u konnessjonijiet iktar profondi bejn l-artisti, l-udjenzi u l-komunitajiet.
Għal aktar informazzjoni u għar-riżultati kollha, żur https://artscouncilmalta.gov.