Il-prosekuzzjoni dalgħodu kompliet bil-kontro-eżami ta’ Yorgen Fenech dwar 17 Black, ħlasijiet li saru lil Melvin Theuma u allegati differenzi bejn ix-xhieda li qed jagħti bħalissa u dak li qal lill-pulizija fl-2019.
Il-prosekutur Godwin Cini staqsa jekk ir-rapporti ta’ Daphne Caruana Galizia dwar 17 Black u l-Electrogas kinux poġġew lil Fenech taħt pressjoni qabel il-qtil tagħha. Fenech ċaħad li dawn tawh xi motiv biex joqtolha.
Cini rrefera għal email li fiha Fenech kien iddeskriva l-Electrogas bħala “żball kbir” li kważi qatlu, filwaqt li qal li kien “imwerwer” dwar il-konsegwenzi fil-media marbuta mal-proġett.
Il-prosekuzzjoni semmiet ukoll kumment li Fenech allegatament kien għamel dwar Caruana Galizia: “Nitfagħha minn hawn isfel, u ma jiddispjaċini xejn.”
Fenech ammetta li għamel dan il-kumment iżda ddeskrivieh bħala “kumment ta’ gosti ħżiena” (“comment in poor taste”).
Il-mistoqsijiet imbagħad daru fuq il-flus li Fenech jammetti li għadda lil Theuma wara l-qtil. Fenech tenna l-istqarrija tiegħu li Keith Schembri tah bejn €75,000 u €80,000 f’basket tar-Reebok wara li l-aħwa Degiorgio talbu €60,000 oħra.
Meta ġie mistoqsi kif seta’ għamel ħlasijiet sostanzjali għal snin sħaħ filwaqt li jsostni li ma kellu x’jaqsam xejn mal-qtil, Fenech qal li Schembri kien “użah”.
Cini kkonfronta wkoll lil Fenech dwar messaġġ fuq Signal li fih wissa lil Theuma: “Jafu bil-bomba fil-garaxx tal-Maksar fiż-Żebbuġ.” Fenech sostna li Schembri kien qallu biex jgħaddi din l-informazzjoni.
Il-prosekuzzjoni akkużat lil Fenech li biddel il-verżjoni tiegħu minn dik li kien ta lill-pulizija fl-2019. Fenech irrikonoxxa li x-xhieda tiegħu tista’ ma tkunx identika, iżda qal li għażel li jixhed biex jgħid il-verità kollha.
Cini staqsa wkoll lil Fenech dwar USB li kien fiha recordings sigrieti ta’ Theuma, li Fenech ammetta li għadda direttament lil Schembri mingħajr ma semagħhom jew għamel kopja tagħhom. Il-prosekuzzjoni ssuġġeriet li kien warrab ir-recordings minħabba li kienu jimplikawh, xi ħaġa li Fenech ċaħad.
Meta ġie mistoqsi għaliex kien lest jieħu dawn ir-riskji biex jipproteġi lil Schembri, Fenech wieġeb: “Kont ħabib leali.”
Cini fakkar ukoll li Fenech kien qal lill-investigaturi: “Ħsibt li stajt insolvi l-problema bil-flus.” Fenech qal li kien jemmen li l-flus setgħu jaħdmu ma’ Theuma għax dan kien “ossessjonat bil-flus”.
In-negozjant Yorgen Fenech, ta’ 44 sena, qed jgħaddi ġuri wara li wieġeb mhux ħati li kien kompliċi fil-qtil tal-ġurnalista Daphne Caruana Galizia u li kien membru ta’ organizzazzjoni kriminali allegatament imwaqqfa biex twettaq l-assassinju.
Il-prosekuzzjoni tallega li Fenech iffinanzja l-pjan tal-qtil u kkomunika mal-allegati qattiela permezz tal-intermedjarju awtodikjarat Melvin Theuma, allegazzjonijiet li Fenech jiċħad.
Il-prosekuzzjoni qed titmexxa mill-avukati tal-Uffiċċju tal-Avukat Ġenerali Godwin Cini, Anthony Vella u Danika Vella, flimkien mal-Assistent Kummissarju Keith Arnaud u l-Ispettur Kurt Zahra. Id-difiża hija mmexxija mill-avukati Charles Mercieca, Gianella Demarco u Gianluca Caruana Curran. L-avukati Therese Comodini Cachia u Jason Azzopardi qed jidhru parte civile f’isem il-familja Caruana Galizia. L-Imħallef Edwina Grima qed tippresiedi l-ġuri.