Il-Bank of Valletta tenna l-impenn tiegħu li joffri soluzzjonijiet ta’ assigurazzjoni u pensjoni ta’ kwalità għolja lill-klijenti, permezz tal-kollaborazzjoni kontinwa tiegħu ma’ Mapfre Msv Life, wara żjara f’Madrid għal grupp ta’ impjegati tal-BOV bi prestazzjoni għolja minn madwar in-network tad-distribuzzjoni tal-Bank.
Iż-żjara qasira ġabret flimkien rappreżentanti miċ-Ċentri tal-Investiment, il-Personal Banking Channels, Business Development & Customer Value, u l-Private Banking tal-BOV. Din l-inizjattiva rrikonoxxiet il-prestazzjoni tajba fis-servizzi tal-assigurazzjoni u l-pensjonijiet matul l-2025, filwaqt li tat ukoll lill-parteċipanti esperjenza diretta ta’ waħda mill-operazzjonijiet internazzjonali ewlenin tal-Grupp.
Matul il-programm, il-parteċipanti żaru l-uffiċċju prinċipali ta’ Mapfre f’Majadahonda, fejn iltaqgħu mal-maniġment u kisbu għarfien dirett dwar il-mudell tan-negozju tal-kumpanija, l-istrateġija tagħha fl-assigurazzjoni fuq il-ħajja, u l-operat tagħha fil-ġestjoni tal-investimenti. Iż-żjara tathom ukoll l-opportunità li jwessgħu l-għarfien tagħhom dwar il-prodotti, jifhmu aħjar l-approċċ ta’ Mapfre lejn is-servizz lill-klijent, u jaqsmu ideat ma’ kollegi u esperti minn madwar il-Grupp.
Lil hinn mir-rikonoxximent tal-kisbiet individwali u tat-timijiet, iż-żjara enfasizzat il-valur tal-iżvilupp professjonali kontinwu biex ir-rappreżentanti tal-BOV isaħħu l-għarfien tagħhom tas-soluzzjonijiet offruti lill-klijenti f’Malta. Saħħet ukoll l-impenn tal-Bank li jinvesti fil-ħiliet u l-kompetenzi meħtieġa biex il-klijent dejjem jingħata parir infurmat fil-qasam tal-assigurazzjoni, il-protezzjoni u l-ippjanar finanzjarju fit-tul.
Alex Bezzina, Kap tal-Insurance Services and Pensions Office fi ħdan il-Bank, akkumpanja lill-grupp. Huwa qal, “Din l-inizjattiva rrikonoxxiet il-kontribut b’saħħtu tat-timijiet tagħna, filwaqt li tathom ukoll espożizzjoni siewja għall-għarfien u l-operat usa’ ta’ Mapfre. Opportunitajiet bħal dawn isaħħu l-għarfien, iħeġġu l-qsim tal-ideat u jgħinuna nkomplu nappoġġjaw lill-klijenti b’aktar kunfidenza u ħiliet meta jiġu biex jieħdu deċiżjonijiet dwar soluzzjonijiet ta’ assigurazzjoni u pensjoni.”
Il-BOV jibqa’ impenjat li jaħdem mill-qrib ma’ Mapfre Msv Life biex ikompli jibni fuq din is-sħubija u jkompli jtejjeb il-kwalità tas-servizz u tas-soluzzjonijiet disponibbli għall-klijenti li qed ifittxu għażliet ta’ protezzjoni, tfaddil u ppjanar għall-irtirar.