Evaristo Beccalossi, wieħed mill-midfielders leġġendarji ta’ Inter, miet fi Brescia nhar l-Erbgħa.
L-eks plejer tal-futbol u maniġer sportiv, li qabel ma ngħaqad man-Nerazzurri lagħab ukoll fil-belt twelidu ta’ Brescia, kien se jagħlaq 70 sena fi ftit jiem, fit-12 ta’ Mejju.
Saħħet Becalossi kienet ilha kritika għal sena wara marda f’Jannar 2025 u perjodu twil f’koma.
Il-mewt seħħet matul il-lejl bejn it-Tlieta u l-Erbgħa fil-klinika Poliambulanza fi Brescia, fejn Beccalossi kien rikoverat l-isptar.
Beccalossi kien wieħed mill-aktar plejers talentużi fil-futbol Taljan. Midfielder offensiv talentuż, huwa kiseb fil-gradi tal-youths tal-belt twelidu Brescia.
Fl-1978 huwa ngħaqad ma’ Inter fejn malajr stabbilixxa ruħu bħala plejer ewlieni għan-Nerazzurri.
Beccalossi gawda karriera stellari ma’ Inter fejn kellu 216-il dehra u skorja 30 gowl.
Matul iż-żmien tiegħu ma’ Inter, Beccalossi rebaħ it-titlu tas-Serie A fl-1979-80 taħt it-tmexxija tal-kowċ Eugenio Bersellini u darbtejn il-Coppa Italia.
Wara li telaq minn ma’ Inter, huwa ngħaqad ma’ Sampdoria u Monza qabel ma temm il-karriera distinta tiegħu ma’ Barletta fis-Serie B Taljana.
Ta’ nota huwa l-fatt li lura fit-13 ta’ Settembru 1978, kien lagħab f’pajjiżna ma’ Inter kontra Floriana f’partita valida minn dik li dak iż-żmien kienet tissejjaħ it-Tazza tat-Tazzi.
Minkejja t-talent tiegħu, Beccalossi qatt ma ssejjaħ mat-tim nazzjonali tal-futbol Taljan fil-livell tal-kbar matul il-karriera tiegħu minħabba l-inkonsistenza u r-rata baxxa ta’ xogħol tiegħu, u ġie eskluż mit-tim rebbieħ tat-Tazza tad-Dinja tal-FIFA tal-1982 mill-kowċ Enzo Bearzot. Huwa lagħab seba’ darbiet mat-tim Taljan fil-livell tal-youths, fejn skorja gowl wieħed.
