Is-Segretarju Parlamentari għaż-Żgħażagħ, ir-Riċerka u l-Innovazzjoni Keith Azzopardi Tanti inawgura l-ftuħ tat-Tieni Kampjonat IEEE Region 8 Robot Championships 2024. Dan iċ-Championship jirrappreżenta pass ieħor sinifikanti fil-ħidma ta’ Malta biex tissaħħaħ fir-riċerka, l-edukazzjoni STEM, u l-innovazzjoni teknoloġika. Dan l-avveniment prestiġjuż, organizzat mill-Institute of Electrical and Electronics Engineers Malta (IEEE Malta), huwa mument importanti għal pajjiżna, li jkompli jibni fuq is-suċċess miksub mill-ewwel edizzjoni li saret f’Diċembru 2022.
Il-Kampjonat tal-2022 attira aktar minn 1,500 parteċipant u laħaq udjenza globali b’live streaming u involviment fuq il-midja soċjali, b’Malta tiġi rikonoxxuta għal eċċellenza fl-edukazzjoni STEM. Għall-ewwel darba, Malta rebħet ukoll il-Premju Nazzjonali għall-Aqwa STEM, li juri l-impatt qawwi ta’ dawn l-inizjattivi fl-ispirazzjoni tal-ġenerazzjoni żagħżugħa biex issaħħaħ il-ħiliet STEM tagħhom.
Għal din is-sena, il-Kampjonat qed jimxi fuq dan il-wirt billi jilqa’ 18-il tim internazzjonali magħżula minn 38 applikant minn madwar id-dinja. Dan l-avveniment mhux biss jgħaqqad robotiċisti esperti u studenti iżda wkoll joħloq opportunità unika għal kollaborazzjoni u skambju ta’ ideat innovattivi fuq livell globali. Il-Kampjonat iservi għan aktar wiesa’ minn sempliċiment kompetizzjoni: it-tisħiħ tal-edukazzjoni STEM. Permezz ta’ sfidi fejn l-istudenti jikkonstruwixxu robots minn xejn, l-inizjattiva tgħin lill-parteċipanti jiksbu ħiliet essenzjali bħal problem-solving, xogħol f’tim, u passjoni għall-innovazzjoni. Dawn il-ħiliet se jkunu fundamentali biex iwasslu lill-istudenti lejn suċċess fil-ħajja tagħhom u jaħdmu għal ekonomija digitali b’saħħitha.
Fid-diskors tiegħu waqt il-ftuħ uffiċjali, is-Segretarju Parlamentari Keith Azzopardi Tanti qal: “Illum qed inkomplu nibnu fuq is-suċċess tal-ewwel edizzjoni tal-IEEE Robot Championships, waqt li nappoġġjaw l-impenn ta’ Malta biex tibqa’ mexxejja fl-edukazzjoni STEM u l-innovazzjoni. Il-kompetizzjoni mhix biss dwar il-bini ta’ robots; hija dwar il-bini ta’ ħiliet u talenti li ser jiddefinixxu l-futur ta’ pajjiżna. B’din l-inizjattiva qed nuri kemm hu importanti li nrawmu impenn għat-tagħlim STEM biex inkomplu nappoġġjaw l-impjiegi ta’ valur għoli u l-kompetittività globali tagħna.”
Malta tibqa’ ffukata fuq il-promozzjoni ta’ STEM permezz ta’ inizjattivi bħall-Kampjonat IEEE Robot Championships, li huma sostnuti minn kollaborazzjonijiet ma’ istituzzjonijiet bħall-Università ta’ Malta, MCAST, u Tech.mt. Dawn il-programmi ma jiġux biss biex jagħmlu l-edukazzjoni STEM aktar attraenti iżda wkoll biex iħejju lill-ġenerazzjonijiet li ġejjin għal rwol attiv fl-ekonomija globali. Dan l-avveniment jagħti wkoll opportunità unika lill-komunità Maltija biex tesperjenza l-qawwa trasformattiva ta’ STEM permezz ta’ wirjiet interattivi u dimostrazzjonijiet. B’dan il-mod, mhux biss jiġu involuti l-istudenti iżda wkoll il-familji tagħhom, u b’hekk tissaħħaħ kultura STEM fuq livell nazzjonali. waqt li tkompli tissaħaħ il-viżjoni ta’ Malta bħala ċentru ta’ eċċellenza fl-edukazzjoni u t-teknoloġija.
