Minn Cristian Muscat
Kif għażilt il-basketball fost tant sport ieħor?
Il-ħajra għal dan l-isport beda minn meta kont nitla’ l-padiljun f’Ta’ Qali nara liż-żewġ kuġini tiegħi jilagħbu.
Fis-sena li fiha iddeċidejt li rrid nipprattika dan l-isport, fl-etá ta’ sitt snin, kont ukoll bdejt nipprattika l-football.
Madankollu, il-progress li kont qiegħed nagħmel fil-basketball minn dejjem kien ikbar u, meta ġie ż- żmien tal-għażla bejn iż-żewġ dixxiplini sportivi, inġbidt iktar lejn il-basketball. Minn dakinhar, skoprejt passjoni kbira li kompliet tikber matul is-snin.
Li jkollok tiddeskrivi dan l-istagun għat-team tieghek, kif tiddeskrivih?
Dan l-istaġun qed jiżvolġi f’wieħed ferm pożittiv.
Għandna team pjuttost ta’ eta’ zgħira u l-maġġoranza tagħna ilna nilgħabu flimkien għal bosta staġuni.
Komplejna nibnu fuq l-affarijiet pożittivi li kellna minn l-aħħar żewġ staġuni, li sfortunatament kellhom jiġu mwaqqfa ħesrem minħabba l-pandemija.
Flimkien mal-players ġodda li ingħaqdu mal-club kif ukoll dawk li telgħin mill-akkademja, qegħdin naħdmu lkoll biex nagħlqu l-istaġun b’diversi suċċessi.
Naturalment, għad fadlilna ħafna fuq xiex naħdmu ħalli logħba wara logħba, nibqgħu nagħtu wirja tajba, kif ilna nagħmlu mill-bidu tal-istaġun.
Kif qed tħares lejn il-futur tat-team ta’ Starlites?
Il-futur ta’ Starlites, fil-kategoriji kollha miż-żgħar sal-kbar, huwa mfawwar b’potenzjal. Inħoss li l-coaches tal-akkademja qegħdin jagħmlu xogħol tajjeb ferm fl-iżvilupp ta’ atleti promettenti li xi darba, għad narawhom jifformaw parti mit- timijiet tal-kbar.
Din is-sena, fl-iskwadra maskili tal-kbar, rajna l-introduzzjoni ta’ madwar erba’ atleti żgħażagħ li għamlu d-debutt tagħhom wara li ilhom telgħin mal-klabb għal diversi snin.
Nemmen li introduzzjonijiet bħal dawn ser inkomplu naraw minnhom fit-team ta’ Starlites, kemm fl-iskwadra maskili kif ukoll f’ dik femminili.
X’kienu l-esperjenzi li kellek sa issa mat-team nazzjonali tal-basketball?
Bħala atleta lokali, ħaġa li ta’ kull sajf inkun qiegħed ħerqana għaliha hija l-kompetizzjoni mat-team nazzjonali.
L-ewwel esperjenza tiegħi mat-team nazzjonali kienet fl-etá ta’ 13-il sena fil-kategorija ta’ taħt is-16 -il sena.
Minn dakinhar, kelli x-xorti li nirrapreżenta lil pajjiżi tliet darbiet fil-kategorija ta’ Taħt is-16-il sena u darbtejn fil-kategorija ta’ Taħt it-18 il-sena.
Is-sajf li għadda, kelli wkoll l-ewwel esperjenza tiegħi mal-iskwadra nazzjonali tal-kbar fil-kompetizzjoni li saret fl-Irlanda, fejn irnexxielna niksbu anke l-midalja tal-bronż.
Inħoss li esperjenzi bħal dawn huma ta’ benefiċċju kbir għall-karriera tiegħi u huma dawn l-opportunitajiet li fihom nista’ verament insarraf is-sagriffiċji kollha li nkun għamilt u it-taħriġ li nkun għaddejt minnu.
X’tikkummenta fuq il Malta Basketball Association mmexxija mill-president ferm ħabrieki Pawlu Sultana?
F’ dawn l-aħħar snin, l- Assoċjazzjoni għamlet minn kollox biex il-basketball f’pajjiżna jkompli jikber u jiġbed iktar nies lejh.
Inħolqu wkoll diversi opportunitajiet biex atleti żgħażagħ jiġu mħarrġa biex jikkompetu f’kompetizzjonijiet internazzjonali sabiex ikomplu jkabbru l-livell tat-talent tagħhom.
Bil-ħidmiet fuq il-padiljun, li ġie renovat is-sena l-oħra, flimkien mal-introduzzjoni tat-training courts ftit tas-snin ilu, l- Assoċjazzjoni qed jirnexxilha tippromwovi iktar dan l-isport mal-pubbliku, kif ukoll toħloq ambjent aħjar fejn aħna l-atleti nistgħu nilagħbu u jkollna is-sessjonijiet tat-taħriġ.
Naħseb li huwa essenzjali għall-basketball Malti li x-xogħol min-naħa tal-Malta Basketball Association ma jieqafx hawn, imma jissokta b’inizjattivi ġodda biex ikompli jogħla l-livell tal-logħba tal- basketball kemm għall-atleti, kif ukoll għall-pubbliku li jinteressa ruħu fiha.
X’tikkummenta fuq ir- riżorsi u l-court il-ġdid fil-padiljun f’Ta Qali li fihom tilagħbu speċjalment meta kkumparati ma’ dawk li tilagħbu fihom barra minn xtutna mat-team nazzjonali?
Il-padiljun f’Ta’ Qali, li għadu kif ġie renovat b’uffiċini, dressings rooms ġodda, u żieda sostanzjali ta’ siġġijiet, ħoloq spazju għal iktar partitarji biex ikunu preżenti għall-logħob.
Barra minn hekk, huwa padiljun li kapaċi sew jospita kompetizzjonijiet internazzjonali.
Riċentament, ġiet installata wkoll sistema li permezz tagħha jiġu trasmessi l-logħob tal-kbar b’mod dirett u din diġá wriet li kienet ta’ benefiċċju kbir, speċjalment waqt din il-pandemija.
Mill-esperjenza tiegħi f’pajjiżi barra minn xtutna, nissokta ngħid li l-padiljun Malti jħabbatha tajjeb ma’ padiljuni barranin, speċjalment ma’ pajjiżi b’daqs u populazzjoni simili għal Malta.
Riżorsi oħrajn bħat- training courts huma ta’ importanza kbira fejn jidħol taħriġ mal-iskwadra, taħriġ personali, kif ukoll xi tournaments li jsiru għall-etajiet tal-mini-basket. Bil-padiljun prinċipali, kif ukoll bir-riżorsi disponnibli għall-pubbliku, inħoss li l-bżonnijiet tal-basketball Malti huma moqdijin sew.
Kif qed thares lejn il-futur tiegħek?
Kieku kelli mmur lura fiż-żmien u nsaqsi din il-mistoqsija lili nnifsi, ma kontx nimmaġina li fl-etá ta’ 19-il sena ħa nkun ilħaqt il-livell ta’ basketball li rnexxieli nilħaq.
Illum il-ġurnata, inħares lejn futur fejn potenzjalment inkun qiegħed nipprattika dan l-isport barra minn Malta.
Nittama ukoll li nkompli nieħu l-esperjenzi li jġibu magħhom il-kompetizzjonijet nazzjonali sabiex ‘il quddiem, inkun nista’ inkun wieħed mill- players ta’esperjenza li jkunu jiffurmaw parti mill-iskwadra Maltija. Ma neskludix il-possibilitá wkoll li iktar tard matul il-karriera tiegħi, nkun qiegħed nieħu ħsieb skwadra żagħżuġħa bl-irwol ta’ coach.
Tixtieq tgħaddi xi ringrazzjamenti partikolari?
L-ewwel ringrazzjament bla dubju għandu jmur lejn il-familja tiegħi, b’mod speċjali ommi u missieri.
Is-sapport li huma juruni u l-motivazzjoni li jagħtuni biex inlaħħaq mal-basketball u l-istudju huwa fattur ferm importanti fil-karriera tiegħi.
Nixtieq anke nirringrazzja lil-coaches kollha li xi darba jew oħra għaddejt minn taħt it-tmexxija tagħhom u li tawni l-esperjenza ta’ logħob li kelli bżonn biex nasal sal-livell li qiegħed fih illum il-ġurnata.
Ma’ dawn, nirringrazzja wkoll il-club ta’ Starlites, b’mod speċjali lil Dr Ivan Riolo, u l-membri tal-iskwadra tagħna, li magħhom għaddejt minn mumenti ta’ telf kif ukoll mumenti ta’ ċelebrazzjoni.
Fl-aħħar u mhux l-inqas, nixtieq nirringrazzja lill- uffiċjali tal-logħba, il-ġurnalisti u l-uffiċjali kollha tal-Malta Basketball Association, li mingħajrhom il-logħba tal-basketball f’Malta ma tkunx possibbli.
Tista’ tgħaddi messaġġ lil dawk li jixtiequ jagħmlu karriera fil-basketball?
Li tifforma parti minn skwadra tal-basketball huwa impenn ferm kbir u teħtieġ numru sustanzjali ta’ sagrifiċċji.
Se jkun hemm mumenti matul il-karriera li wieħed jiddubita lilu nnifsu u saħansitra jibda jaqta’ qalbu li jista jgħolli il-livell tiegħu.
Huwa hawnhekk il-punt fejn għandek taħdem iktar minn ħaddieħor u toħloq ħin sabiex tmur titħarreġ b’mod personali.
Bħal kull ħaġa fil-ħajja, xejn ma jiġi b’xejn. Jekk atleta irid jasal f’ dan il-livell u iktar, ma jistax jaħdem bl-aptit jew skont x’ jaqbillu.
Dejjem ħa jkun hemm min ikun pass iktar ‘il quddiem minnek u dik il-ħaġa għandha timmotivak biex taħdem iktar u titjieb.
