Il-Knisja Parrokkjali tax-Xewkija, magħrufa aħjar bħala r-Rotunda, hija waħda mill-aktar binjiet distintivi u li tispikka fil-Gżejjer Maltin. Il-koppla maestuża tagħha, il-proporzjonijiet impressjonanti u l-pożizzjoni prominenti tagħha fil-qalba ta’ Għawdex jippożizzjonawha bħala ikona tal-wirt reliġjuż, kulturali u arkitettoniku ta’ pajjiżna.
Ir-Rotunda tax-Xewkija, bil-kobor u l-prestiġju arkitettoniku tagħha, hija monument mill-isbaħ li jistħoqqilha tiġi ammirata mhux biss matul il-jum, iżda wkoll wara nżul ix-xemx.
Il-proġett propost ta’ illuminazzjoni esterna għandu l-għan li jkompli jsebbaħ il-knisja u joħroġ aktar il-karatteristiċi distintivi tagħha, filwaqt li jagħtiha preżenza impressjonanti matul il-lejl, li tkun tista’ titgawda kemm mir-residenti u kemm mill-viżitaturi, mhux biss mix-Xewkija iżda wkoll minn diversi nħawi oħra ta’ Għawdex u lil hinn. Għal dan il-għan, il-Parroċċa tax-Xewkija ħarġet Tender Pubbliku għall-Provvista u l-Installazzjoni tad-Dawl Estern tal-Knisja Parrokkjali.
Il-proġett għandu l-għan li jintroduċi sistema ta’ dawl imfassla b’attenzjoni sabiex tenfasizza l-karatteristiċi uniċi u l-identità distintiva ta’ din il-knisja monumentali, filwaqt li jiġu rispettati s-sinifikat storiku u dak reliġjuż tagħha. Meta jitlesta, dan il-proġett, li jħaddan ukoll kunsiderazzjonijiet ambjentali, mistenni jagħti dehra ġdida lir-Rotunda matul il-lejl, ikompli jsaħħaħ l-identità viżiva tax-Xewkija u jżid mal-ġmiel kulturali u arkitettoniku ta’ Għawdex.
Dan il-proġett qed jiġi implimentat b’kollaborazzjoni mal-Ministeru għal Għawdex u huwa ffinanzjat mill-Iskema għad-Dawl tal-Faċċati Esterni tal-Knejjes f’Għawdex.
L-operaturi ekonomiċi interessati huma mistiedna jiksbu d-dokumenti tas-Sejħa għall-Offerti mis-sit elettroniku tal-Parroċċa tax-Xewkija: https://www.xewkijaparish.org/tender-03-2026/.
L-aħħar data għas-sottomissjoni tal-offerti hija l-Ġimgħa 11 ta’ Diċembru 2026, fil-11.00am.