Il-President Russu, Vladimir Putin, wissa lill-Ewropa li billi tfittex li tnaqqas gradwalment il-provvisti tal-enerġija mir-Russja, mhi se tkun qed tagħmel xejn ħlief li tweġġa’ lilha nnifisha biss.
Il-President Russu għamel din it-twissija waqt li qal li s-settur taż-żejt kien għaddej minn “bidla tettonika” iżda sostna li l-Ewropa se tkun qed tagħmel “suwiċidju ekonomiku” bis-sanzjonijiet tagħha fuq Moska minħabba l-gwerra fl-Ukrajna.
Huwa ħeġġeġ lill-uffiċjali tal-istat biex jaraw li jużaw il-manuvri “maħsbun ħażin” mill-Punent għall-vantaġġ tal-pajjiż.
Putin, li kien qed jitkellem waqt laqgħa dwar l-enerġija, qal li l-Ewropa se tara prezzijiet tal-enerġija ogħla u inflazzjoni ogħla bħala riżultat tal-azzjonijiet tagħha kontra r-Russja.
Wara li l-Kremlin bagħat truppi fl-Ukrajna fl-24 ta’ Frar li għadda, il-Punent daħħal fis-seħħ sanzjonijiet bla preċedent kontra r-Russja. Il-pajjiżi tal-Punent urew koordinazzjoni sħiħa u mill-qrib fit-twissijiet tagħhom ta’ pieni kontra r-Russja.
Putin qed jittama li jindirizza mill-ġdid il-provvisti lejn pajjiżi “ħbieb” hekk kif nazzjonijiet Ewropej qed ifittxu modi kif jinfatmu mill-enerġija Russa. Fl-istess waqt huwa jqis li l-“azzjonijiet kaotiċi” tal-Ewropa mhux biss qed jagħmlu ħsara lill-ekonomija tagħha stess, iżda qed iwasslu wkoll għal żieda fid-dħul miż-żejt u l-gass għar-Russja.
“Il-bidliet fis-suq taż-żejt huma ta ‘natura tettonika’ u li jagħmlu negozju bħas-soltu, skont il-mudell l-antik jidher improbabbli”. Huwa żied jgħid li “Fil-kundizzjonijiet il-ġodda, huwa importanti mhux biss li jiġi estratt iż-żejt, iżda wkoll li tinbena l-katina vertikali kollha li twassal għall-konsumatur finali”.
Putin qal li l-Gvern se jgħin lill-kumpaniji jbiddlu l-mudelli tan-negozju tagħhom waqt li stqarr li l-istat se jgħin biex itejjeb il-loġistika kif ukoll l-ipproċessar fil-fond tal-idrokarburi u jiżgura ħlasijiet f’muniti nazzjonali.
