Il-Ministru għall-Ambjent, l-Enerġija u r-Riġenerazzjoni tal-Port il-Kbir Miriam Dalli laqgħet il-mod innovattiv ta’ kif qed topera kumpanija Maltija u li qed tistabbilixxi standards ġodda għall-industrija tal-manifattura tal-plastik f’Malta.
Akkumpanjata mill-Kap Eżekuttiv ta’ Circular Economy Malta Jason Vella, il-Ministru Dalli żaret MCL Components Limited f’Bulebel. MCL Components tidiżinja u tipproduċi prodotti li jistgħu jintużaw aktar minn darba u li faċilment jiġu riċiklati fi tmiem il-ħajja tagħhom. Il-prodotti huma ddisinjati b’mod metikoluż biex jilqgħu għall-ħtiġijiet tal-klijenti tagħhom, u b’hekk jimminimizzaw l-iskart u jħallu impatt ambjentali pożittiv. Kwalunkwe materjal żejjed iġġenerat mill-proċess tal-manifattura jiġi riċiklat minn MCL Components u jinbidlu fi prodotti oħra.
Waqt iż-żjara, il-Ministru Dalli enfasizzat l-importanza li jiġu appoġġjati u inċentivati inizjattivi ta’ sostenibbiltà minn intrapriżi lokali. Hija enfasizzat ukoll il-ħtieġa ta’ azzjoni kollettiva f’din it-tranżizzjoni lejn mudell ekonomiku ċirkolari, fejn ir-riżorsi jintużaw b’mod effiċjenti, u l-iskart jiġi mnaqqas permezz ta’ prattiċi innovattivi.
“Billi tħaddan prattiċi sostenibbli fil-manifattura u tipprijoritizza r-responsabbiltà ambjentali, MCL Components Limited qed tkun ta’ eżempju fl-industrija. L-impenn tagħhom lejn operat net zero waste, net zero energy, flimkien mal-użu ta’ materjali li faċli jiġu riċiklati u proċessi ta’ produzzjoni li ma jniġġsux jirrifletti d-dedikazzjoni tagħhom għall-prinċipji tal-ekonomija ċirkolari,” qalet il-Ministru Dalli.
Il-Kap Eżekuttiv ta’ Circular Economy Malta Jason Vella enfasizza s-sinifikat ta’ ekonomija ċirkolari fit-totalità tagħha għall-manifattura lokali fejn il-prodotti huma ddisinjati u manifatturati biex jerġgħu jintużaw kompletament fi tmiem il-ħajja tagħhom. Saħaq li dan il-metodu huwa ta’ benefiċċju ekonomikament kemm għall-produtturi kif ukoll għall-klijenti u jħalli impatt pożittiv fit-tul fuq l-ambjent.
Is-Sur Vella rrefera wkoll għall-inizjattiva riċenti ‘Bring Your Own Container’ imnedija mill-Aġenzija, fejn il-konsumaturi huma mħeġġa jżuru u jixtru mingħand ħwienet irreġistrati mal-Aġenzija, u jagħmlu użu minn kontenituri li jerġgħu jintużaw għal inċentiv finanzjarju implimentat mit-tali ħanut. Billi jagħżlu kontenituri li jerġgħu jintużaw, il-konsumaturi jikkontribwixxu b’mod attiv biex jitnaqqas il-konsum tal-plastik li jintuża darba u u jippromwovu kultura mfassla fuq il-prinċipji tal-ekonomija ċirkolari.
Għal aktar informazzjoni, segwi s-socials ta’ Sostenibilità u Circular Economy Malta.
