“Jake għallimna kif tkun umli, kif ma tieqafx tiġġieled quddiem tbatija kbira, kif tqum kull filgħodu ħerqan biex tgħix, kif tqassam dak kollu li għandek għax f’hekk issib il-ferħ.”
Dan sostnewh Puttinu Cares hekk kif dalgħodu sfortunatament taw l-aħbar li ċ-ċkejken Jake kien ħalla d-dinja wara li għal dawn l-aħħar xhur kien jinsab rikoverat ġewwa Rainbow Ward.
Puttinu Cares qalu li Jake għallimhom x’inhi l-vera mħabba dik li ma tintemmx, imħabba bla limitu għall-familja.
Huma tkellmu wkoll dwar kif il-ġenituri tiegħu Jeanelle u Kevin soffrew fis-skiet pero għamlu l-impossibli biex Jake jkun trankwill.
“Ħajtu kienet talba kontinwa. Jake kien iħobb il-Milied u l-ferħ. Bl-iSweet Shop f’dan iż-żmien kien iqum kull filgħodu anke jekk ma jiflaħx biex iqassam il-ħelu lil kulħadd. Kien iħobb lil Ġesù u għalhekk fi żmien il-Milied issa qiegħed fi ħdanu mingħajr iżjed tbatija,” temmew jgħidu Puttinu Cares.
