Ritratt: Persian Independent
Skont rapporti, it-Taliban qatgħu ras plejer tal-volleyball taż-żgħażagħ tan-nisa u r-ritratt ta’ rasha tpoġġa fuq il-midja soċjali.
Mahjabin Hakimi, stilla tal-futur tal-volleyball tal-Muniċipalità ta’ Kabul, inqatlet mill-ġiħadisti aktar kmieni dan ix-xahar, sostna l-kowċ tagħha.
Il-mewt ta’ din it-tfalja qed tiġi rappurtata issa minħabba li l-militanti Iżlamiċi heddew lill-familja tagħha biex ma jgħidu lil ħadd x’ġara.
Wara li r-ritratt tar-ras maqtugħa tagħha tpoġġa fuq l-internet, il-kowċ iddeċieda li għandu jitkellem.
“Il-plejers kollha tat-tim tal-volleyball u l-bqija tan-nisa atleti jinsabu f’sitwazzjoni ħażina u fid-disperazzjoni u l-biża‘,” huwa qal.
“Kulħadd ġie mġiegħel jaħrab u jgħix f’postijiet mhux magħrufa.”
Mahjabin kienet tilgħab mal-klabb ta‘ Kabul qabel it-Taliban ħatfu l-poter mill-gvern appoġġjat mill-Istati Uniti fl-aħħar ta’ Awwissu.
Il-kowċ qal li kienet waħda minn żewġ tfajliet biss li ma rnexxielhomx jaħarbu mill-Afganistan.
Talbiet konfliġġenti fuq il-midja soċjali qalu li Mahjabin kienet inqatel b’mod misterjuż ġimgħa qabel it-Taliban ħatfu Kabul.
Il-fatt li hija ġiet maqtula b’dan il-mod nissel biżgħa kbir fost l-atleti nisa li jinsabu moħbija fl-Afganistan stess.
Skond l-interpretazzjoni stretta tiegħu tal-liġi tax-Xarija, it-Taliban ma jippermettux lin-nisa jilagħbu sport jew iħallihom jipparteċipaw fix-xogħol jew fl-edukazzjoni.
