It-tennista Ġappuniż, Naomi Osaka, se titlef il-kumplament tal-istaġun wara li ħabbret li hija qed tistenna tarbija.
Osaka, rebbieħa ta’ erba’ Grand Slams, il-ġimgħa li għaddiet irtirat mill-Open tal-Awstralja, li se jingħata bidu proprju nhar it-Tnejn li ġej, mingħajr ma ngħatat l-ebda raġuni uffiċjali … iżda nhar l-Erbgħa hija tat l-evidenza għad-deċiżjoni tagħha billi poġġiet ritratt ta’ scan ta’ tarbija fuq Instagram.
“Ninsab ħerqana li nirritorna għal-logħba iżda għandi aġġornament għal dan l-istaġun,” kienet tgħid l-istqarrija.
Hija żiedet tgħid: “L-aħħar ftit snin kienu interessanti iżda, bla dubju, iż-żmien li ġej se jkun ta’ sfida u aktar divertenti.
“Dawn il-ftit xhur ‘il bogħod mill-isport tassew tawni imħabba u apprezzament għal-logħba li ddedikajt ħajti għaliha.
“Nirrealizza li l-ħajja hija daqshekk qasira u għaldaqstant napprezza kull mument għax kull ġurnata hija barka u avventura ġdida.
“Naf li għandi ħafna x’inħares ‘il quddiem fil-futur … u ħaġa waħda li qed nistenna hi li t-tarbija tiegħi tara waħda mil-logħbiet tiegħi u tgħid lil xi ħadd … ‘dik hi ommi,’.
“L-2023 se tkun sena mimlija lezzjonijiet għalija u nittama li nirritorna għat-tournament tiegħi li jmiss … dak tal-Open tal-Awstralja tal-2024.”
