Jgħix f’appartament bla servizz tad-dawl u ilma

L-appartament mhux miżmum. La hemm servizz ta’ dawl u lanqas ta’ ilma. Ir-raġel li jgħix fih Paul Marmara, jiddikjara li kellu problema tal-logħob u waqa’ lura fil-ħlas tal-kera. Jiddikjara li hu baqa’ dejjem jgħix f’dan il-post mikri mingħand l-Awtorità għad-Djar.

It-Tribunal quddiem l-evidenza ippreżentata qal li “s-sitwazzjoni tar-raġel, m’hi xejn feliċi u huwa verosimili li jgħix f’dawn il-kundizzjonijiet prekarji u li ladarba m’għandux il-mezzi biex ikollu s-servizzi tad-dawl u l-ilma, peress li hemm kontijiet pendenti, allura huwa kostrett jgħix f’dawn il-kundizzjonijiet, li biex itaffihom jagħmel kemm jista’ jkun ħin barra mill-fond u jirritorna fih biss biex jorqod”. It-tribunal iħassar u jirrevoka l-iżgumbarament.

Mis-sentenza tat-Tribunal jirriżulta li r-raġel  jgħid li  ilu joqgħod fil-fond in kwistjoni madwar tletin  sena u qatt ma ċċaqlaq minn hemm ħlief forsi biex imur jara t-tfal barra minn Malta.

Spjega wkoll li l-korrispondenza kollha, mingħand Dipartimenti tal-Gvern u istituzzjonijiet oħra, jirċeviha fil-fond in kwistjoni. Xehed li jaħdem regolari u wara l-ħin tax-xogħol imur ġewwa ħanut il-Belt u jmur id-dar biss biex jorqod. Huwa kompla jgħid li kellu problema tal-logħob 

u għalhekk kien waqa’ lura f’xi pagamenti tal-kera. Spjega li huwa qatt ma rċieva interpellazzjonijiet biex jiżgombra qabel sab karta mwaħħla mal-bieb tad-dar u mar għand l-avukat biha. 

Intqal li b’ittra datata 6 ta’ Ġunju tas-sena 2016 l-Awtorità tad-Djar informatu li ma kinitx l-intenzjoni tagħha li ġġedded il-kirja u talbitu jirritorna ċ-ċwievet . Però jirriżulta li l-Awtorità  ma pproċedietx immedjatament għall-iżgumbrament.

It-Tribunal jirrileva li l-Awtorità intimata ma ppreżentatx ittra tat-23 ta’ Ġunju 2016 li allegatament ġiet riċevuta minnha da parti tal-avukat tar-raġel. Esebiet biss ir-risposta tagħha fejn infurmat lill-istess avukat li r-raġel mhux qed jokkupa l-fond regolarment, li kien hemm arretrati ta’ kera x’jitħallsu, però talbet ukoll sabiex ir-raġel ipprovdilha l-kontijiet tad-dawl u ilma. 

It-tribunal qal li kieku l-Awtorità kienet deċiża fl-intenzjoni tagħha kienet tibqa’ tinsisti li r-raġel jirritornalha ċ-ċwievet u mhux tistiednu jibgħatilha l- kontijiet tad-dawl u ilma. 

Issemma li fl-2016, l-Awtorità wettqet ħames spezzjonijiet filgħodu fejn ir-raġel ma nstabx id-dar u oħra fl-2020 fejn meta ġie nfurmat bl-ispezzjoni, huwa mar fil-fond wara ftit ħin.

Illi l-uffiċjal li għamel dawn l-ispezzjonijiet ħa xi ritratti tal-fond meta spezzjonah fl-2020. It-Tribunal josserva li ma ngħatat ebda spjegazzjoni għala fil-ħames spezzjonijiet li saru fl-2016 l- uffiċjal inkarigat ma għamilx kuntatt mar-raġel kif għamel fl-2020. 

It-Tribunal iqis li biex isiru spezzjonijiet kif għandhom isiru, dawn m’għandhomx isiru biss fil-ħin ta’ filgħodu meta n-nies ikunu għax-xogħol jew jagħmlu l-qadi tagħhom. L-ispezzjonijiet għandhom isiru f’ħinijiet differenti tal-ġurnata.

It-Tribunal ikkonsidra wkoll ir-ritratti esebiti fejn għalkemm tidher dehra ġenerali ta’ appartament mhux miżmum pinna, però, t-Tribunal ra wkoll illi l-appartament kien fih ħwejjeġ, żraben u affarijiet tal- ikel, u dan meta l-istess spezzjoni saret mingħajr ebda pre-avviż.

It-Tribunal josserva illi l-informazzjoni mgħoddija lilu mill-uffiċjal tal-Awtorità dwar l- ispezzjoni li saret fl-2020 hija waħda dgħajfa ħafna. Hu minnu li l-appartament huwa mingħajr dawl u ilma, min-naħa l-oħra r-raġel li huwa juża l-fond biex jorqod biss għax filgħodu jaħdem u filgħaxija jmur fi stabbiliment ta’ ħabib tiegħu ġewwa l-Belt stess.

Illi għalkemm dan it-Tribunal iqis illi huwa diffiċli ferm biex fiż-żminijiet tal-lum wieħed jgħix mingħajr dawl u ilma, iqis li s-sitwazzjoni finanzjarja murija lil dan it-Tribunal mir-raġel, m’hi xejn feliċi u huwa verosimili li jgħix f’dawn il-kundizzjonijiet prekarji u li ladarba m’għandux il-mezzi biex ikollu s-servizzi tad-dawl u l-ilma, peress li hemm kontijiet pendenti, allura huwa kostrett jgħix f’dawn il-kundizzjonijiet, li biex itaffihom jagħmel kemm jista’ jkun ħin barra mill-fond u jirritorna fih biss biex jorqod.

Illi pero`, fil-fehma tat-Tribunal, dan ma jfissirx li r-raġel mhux qed jagħmel użu mill-fond de quo.  It-Tribunal, laqa’ it-talbiet tar-raġel u ħassar u irrevoka d-deċiżjoni tal-Awtorità.