“Jien twelidt hawn. Xorta nmur Ħal Far kull sena. Mhux ġust dak li qed isir. Xi ħaġa trid tinbidel. Jien għandi familja Maltija. Għandi nanna u nanna. Huma rabbewni ukoll. Mhux ġust li jien niġi trattat differenti. Għandi l-ħbieb hawn. Jekk jibagħtu lil ommi u lil missieri jien m’għandix fejn inmur.”
Din kienet il-karba ta’ tifel Etjopjan. Karba li turi dak li għaddej minnu quddiem id-deċiżjoni tal-gvern li jiddeporta ammont ta’ Etjopjani minn Malta. Deċiżjoni li qiegħda tiġi kritikata għax hi deċiżjoni inumana u għax tista’ tpoġġi riskji fuq id-drittijiet umani ta’ dawn l-istess persuni.
Waqt li d-deċiżjoni mhix tinftiehem minn għadd ta’ attivisti li jaħdmu qrib l-immigranti u dan minħabba l-fatt li dawn l-persuni li ġew arrestat u spiċċaw fid-detenzjoni kienu ilhom f’Malta għadd ta’ snin, jaħdmu u Integral fis-soċjetà.
Il-pjani tal-Gvern wasslu għal kritika qawwija. Diversi dawk li esprimew ruħhom pubblikament u anke b’messaġġi. Il-Moviment Graffitti organizza protesta quddiem iċ-Ċentru ta’ Detenzjoni f’Ħal Safi.
F’messaġġ li għamlu ddikjaraw li “aħna, min iħaddem, kollegi, ħbieb, membri ta’ diversi komunitajiet u organizzazzjonijiet madwar Malta — qed ningħaqdu b’solidarjetà ma’ ħamest irġiel li jinsabu detenuti. Qed nappellaw lill-awtoritajiet biex jieħdu azzjoni urġenti u jeħilsuhom mid-detenzjoni, filwaqt li jwittu t-triq biex membri tal-komunitajiet tagħna li ilhom f’Malta għal tul ta’ żmien ikunu jistgħu jirregolarizzaw l-istatus tagħhom.”
Il-Moviment Graffitti qal li “ħamest irġiel bħalissa jinsabu miżmuma fiċ-Ċentru ta’ Detenzjoni ta’ Ħal Safi wara rejds li għamel il-Gvern fuq il-komunità Etjopjana, li ilha stabbilita f’Malta. Għall-biċċa l-kbira ta’ żewġ deċennji, dawn l-irġiel bnew ħajjithom hawn, ħadmu legalment, ħallsu s-sigurtà soċjali u t-taxxi, imlew il-lakuni fil-qasam tax-xogħol u taw kontribut għat-tkabbir tal-ekonomija tagħna. Huma għandhom ħbieb, familjari u kollegi u jiffurmaw parti integrali mit-tessut soċjali tagħna. Bħalissa qed jaffaċċjaw ir-riskju li jiġu deportati kontra qalbhom lejn l-Etjopja, pajjiż li ilhom li telqu warajhom, u li fih hemm ir-riskju ta’ persekuzzjoni.”
Il-Graffitti enfasizzaw li “aħna ningħaqdu kontra r-rejds tal-Gvern fuq residenzi privati li jisparixxu lil persuni mill-komunitajiet tagħna f’nofs ta’ lejl. Dawn ir-rejds jesponu lill-aktar persuni vulnerabbli, fosthom tfal u anzjani, għal atti ta’ vjolenza mill-Istat, u jġiegħlu lil persuni li m’għandhomx dokumenti, u li ħafna minnhom ilhom jgħixu hawnhekk għexieren ta’ snin, jgħixu fil-biża’ u fl-inċertezza.
Dawk fostna li jħaddmu qed jopponu r-rejds tal-Gvern fil-postijiet tan-negozju, u d-detenzjoni u d-deportazzjoni ħesrem ta’ impjegati essenzjali. B’rispett nitolbu li l-awtoritajiet jirrikonoxxu li l-migranti li ilhom hawn għal tul ta’ żmien jiffurmaw parti imprezzabbli mill-forza tax-xogħol tagħna.
Persuna li tħaddem lil wieħed mill-irġiel detenuti nnotat li “r-raġel wera impenn bla waqfien kemm lejn il-komunità tiegħu kif ukoll lejn il-post tax-xogħol tiegħu. Huwa ħallas it-taxxi b’mod konsistenti u kkontribwixxa b’mod pożittiv għall-ekonomija lokali, u wera li huwa membru tas-soċjetà responsabbli li josserva l-liġi.
Fiż-żmien tiegħu hawn, bena relazzjonijiet b’saħħithom u integra mal-oħrajn bis-sħiħ, u għex ħajja onesta li tirrifletti d-dedikazzjoni tiegħu għall-valuri ta’ dan il-pajjiż. Nitolbu għall-mogħdrija u l-kompassjoni meta jiġi eżaminat il-każ tiegħu. It-tneħħija tiegħu mhux biss tkun telf sinifikanti għall-organizzazzjoni tagħna iżda wkoll għall-komunità li bbenefikat mix-xogħol iebes, il-lealtà, u l-integrità tiegħu.”
Il-Graffitti sostnew li “m’hemmx dubju wkoll li dawn ir-rejds u deportazzjonijiet huma prodott ta’ politika mhux maħsuba sew. L-ammont ta’ enerġija istituzzjonali u flus ħerġin mit-taxxi tagħna li ntefqu biex jiġbru u jippruvaw jiddeportaw ħamest irġiel huwa kważi inkalkulabbli.
Kemm se jkun nefaq ewro mit-taxxi tagħna l-Gvern biex jipprova jiddeporta wieħed minn dawn l-irġiel? Dak li qed naraw mhuwiex prodott ta’ politika tal-Gvern meqjusa, iżda teatrin għali li bih l-awtoritajiet qed jippruvaw jirrispondu għal elementi ksenofobiċi.
Ma nistgħux naċċettaw dan kollu u noqogħdu kwieti waqt li l-awtoritajiet jagħmlu r-rejds fid-djar u jisparixxu lil sħabna u l-kollegi tagħna. Posthom huwa magħna.”
