Sa tmiem din il-ġimgħa se jsiru aktar ħlasijiet tal-allowance tal-istudenti li jibqgħu jistudjaw wara l-edukazzjoni sekondarja. Fil-fatt ser ikunu qed jitħallsu 574 familja oħra b’investiment ta’ €290,000.
B’hekk, b’kollox, l-ammont ta’ familji li bbenefikaw s’issa qabeż l-10,000 waqt li n-numru ta’ studenti eliġibbli laħaq il-11,000.
Fuq dan il-benefiċċju biss, sa issa ġew investiti €5.5 miljun.
Dawk il-familji li qed jitħallsu fi tmiem il-ġimgħa jinkludu dawk li uliedhom jistudjaw f’istituzzjonijiet edukattivi privati jew barranin u każi oħrajn li ma kinux tħallsu f’Mejju minħabba li l-informazzjoni dwarhom kienet għadha mhux aġġornata.
Għad baqa’ 472 każ ieħor li qed jiġu vvettjati fejn qed isir tqabbil bejn id-data tad-Dipartiment tal-Edukazzjoni u dik tas-Sigurtà Soċjali. Il-Ministeru għall-Politika Soċjali u d-Drittijiet tat-Tfal qed jagħmel kull sforz sabiex dan il-proċess jiġi konkluż fl-iqsar żmien possibbli.
