Isaac Pace ta’ 21 sena tpoġġa taħt ordni ta’ probation wara li ammetta li kellu x’jaqsam sesswalment ma’ tfajla minorenni ta’ 14 -il sena, meta kellu 20 -il sena.
Il-Prosekuzzjoni spjegat li l-każ beda meta t-tfjala daħlet l-Isptar u rriżulta li minn testijiet illi sarulha, irriżulta li kellha infezzjoni trażmessa sesswalment.
Spjegat li l-Pulizija tkellmet mat-tifla, filwaqt li preżenti kien hemm ommha, is-social worker u avukat tal-Aġenzija Appoġġ. Mal-Pulizija, it-tifla spjegat li ltaqgħet ma’ żagħżugħ, fejn allegatament kellhom x’qasmu flimkien ftit tal-ħin wara li ltaqgħu f’latrina pubblika f’Ħal Tarxien.
Il-Pulizija kellmet ukoll lill-akkużat, li min-naħa tiegħu sostna li ma kienx jaf li kien għad kellha 14-il sena. Filwaqt li wieġeb li huwa ħati għall-akkużi miġjuba kontrih, irrimarka li ddispjaċih għal dak illi għamel.
Wara li fil-Qorti ammetta għall-akkużi miġjubin kontrih il-Maġistrat Claire Stafrace Zammit poġġietu taħt ordni ta’ probation għal 3 snin u ordnatlu wkoll jagħmel 80 siegħa xogħol fil-komunità.
Il-prosekuzzjoni f’dan il-każ tmexxiet mill-Avukat Cynthia Tomasuolo mill-Uffiċċju tal-Avukat Ġenerali u l-Ispettur Joseph Busuttil.
