It-Tlieta, fil-Bini Reduta tal-Filarmonika Slovakka, fi Bratislava, ittellgħu l-poloz tal-fażi finali tal-Kampjonat Ewropew ta’ Taħt il-21 sena li se ssir fi Slovakkja, bejn il-11 u t-28 ta’ Ġunju, 2025.
Il-logħbiet se jintlagħbu fi tmien grounds fi tmien bliet differenti madwar il-pajjiż.
Din il-fażi finali se tkun it-tielet waħda mill-espansjoni għal 16-il team, wara l-edizzjoni tal-2021 fl-Ungerija u s-Slovenja, u t-tournament tal-2023 f’Georgia u r-Rumanija.
It-team tas-Slovakkja ingħaqad mal-15-il team l-oħra li għaddew mill-fażi tal-gruppi ta’ kwalifikazzjoni li ntemmet fil-15 ta’ Ottubru, u t-tliet rebbieħa tal-play-offs fil-15 u d-19 ta’ Novembru.
Il-poloz ittellgħu hekk:
– Grupp A: Slovakkja, Spanja, Italja, Rumanija
– Grupp B: Rep. Ċeka, Ingilterra, Ġermanja, Slovenja
– Grupp C: Portugall, Franza, Polonja, Georgia
– Grupp D: Finlandja, Olanda, Ukrajna, Danimarka
L-ewwel żewġ timijiet jikkwalifikaw għall-kwart-finali.
