Il-midfielder ta’ Chelsea Jorginho ma jinsabx f’diskussjonijiet mad-detenturi taċ-Champions League dwar kuntratt ġdid fi Stamford Bridge.
L-internazzjonali Taljan reġa’ kien player importanti għall-Blues dan l-istaġun, fejn għamel 18-il dehra fil-kompetizzjonijiet kollha, skorja erba’ darbiet u pprovda assist wieħed fil-proċess.
Il-ftehim attwali ta’ Jorginho f’Londra għandu jiskadi f’Ġunju 2023, u kien hemm suġġerimenti li Chelsea qed jippjanaw li jżommu diskussjonijiet mal-midfielder dwar estensjoni.
Madankollu, l-aġent tal-midfielder qal li bħalissa mhux qed isiru taħditiet bejn iż-żewġ partijiet.
“M’aħniex f’taħditiet biex Jorginho jestendi l-ftehim attwali ma’ Chelsea. Għadu taħt kuntratt sa Ġunju 2023 – forsi niftħu taħditiet fix-xhur li ġejjin,” qal Santos.
Żball ta’ Jorginho wassal biex Jadon Sancho skorja għal Manchester United fil-Premier League nhar il-Ħadd wara nofsinhar, iżda aktar tard it-Taljan ġab l-iskor indaqs minn penalty biex kiseb punt lit-team tiegħu.
