Il-midfielder ta’ Borussia Dortmund, Jude Bellingham, eskluda l-prospett li jħalli l-club Ġermaniż fis-suq tat-trasferimenti tas-sajf.
L-internazzjonali Ingliż malajar addatta ruħu fil-Bundesliga peress li ngħaqad magħhom eżatt wara għeluq is-17-il sena mingħand Birmingham City fis-sajf tal-2020.
Bellingham beda jitqies bħala wieħed mill-iktar players affidabbli ta’ Marco Rose fejn irreġistra total ta’ sitt golas u 13-il assist fi 43 dehra fil-kompetizzjonijiet kollha f’dan l-istaġun, inklużi 31 partita li beda fil-Bundesliga.
Il-progress mgħaġġel taż-żagħżugħ ta’ 18-il sena wasslitu wkoll għal 12-il partita għall-Ingilterra, b’Gareth Southgate mistenni jsejjaħlu wkoll fit-Tazza tad-Dinja tal-2022 fil-Qatar.
Il-wirjiet ta’ Bellingham naturalment wasslu għal interess sinjifikanti fis-servizzi tiegħu, jiġifieri minn Manchester United u Liverpool, filwaqt li Manchester City ukoll ġew marbuta b’offerta għalih.
