Il-manager ta’ Liverpool Jurgen Klopp ingħata sospensjoni ta’ logħba waħda wara li l-FA rebħet appell kontra deċiżjoni inizjali li timmultah biss għal kondotta mhux xierqa.
Klopp tkeċċa għal protesti eċċessivi mal-assistent referee fir-rebħa ta’ 1-0 fuq Manchester City, ix-xahar li għadda, wara li Mohmaed Salah ma rebaħ l-ebda foul wara li twaqqa’ minn Bernardo Silva.
Oriġinarjament, il-coach Ġermaniż ġie mmultat £30,000 għall-inċident wara reviżjoni minn Kummissjoni Regolatorja Indipendenti, iżda l-FA appellat dan il-verdett u Klopp issa se jservi sospensjoni ta’ logħba.
“Il-Bord tal-Appell indipendenti ppermetta l-appell tal-FA kontra s-sanzjoni ta’ Kummissjoni regolatorja Indipendenti fir-rigward tal-każ riċenti li jinvolvi lil Jurgen Klopp,” qalet stqarrija mill-FA.
“B’riżultat ta’ dan, il-manager ta’ Liverpool ġie sospiż partita waħda b’effett immedjat, immultat £30,000, u wissa dwar l-imġieba tiegħu fil-futur.
“Jurgen Klopp qabel ammetta li kiser ir-regola E3 waqt il-partita tagħhom tal-Premier League kontra Manchester City FC nhar il-Ħadd 16 ta’ Ottubru 2022 u ġie mmultat £30,000.”
Huwa se jkun sospiż fil-logħba kontra Southampton li se tintlagħab f’Anfield, nhar is-Sibt.
L-assistent manager Pep Lijnders se jmexxi lil Liverpool minn fuq il-linja fin-nuqqas ta’ Klopp.
