Minn żmien għal żmien, sfortunatament, nisimgħu b’każijiet ta’ ħtif ta’ minuri li fin-natura tiegħu huwa ta’ għadab u wġigħ kbir għall-ġenitur li jiġi mċaħħad mill-wild tiegħu u huwa wkoll ta’ inkwiet għall-pajjiż li minnu jinħareġ l-istess minuri.
Sakemm il-pajjiż li jittieħdu fihom dawn it-tfal huma firmatarji tal-Konvenzjoni ta’ Hague, il-kwistjoni tista’ tiġi riżolta bejn iż-żewġ pajjiżi. Il-problema hija meta dawn it-tfal jittieħdu f’pajjiż li mhuwiex signatarju ta’ din il-Konvenzjoni.
Fil-fatt, każijiet fejn tfal jinħatfu u jittieħdu f’pajjiżi simili fosthom il-Libja, iċ-Ċina u n-Niġerja, sfortunatament il-proċedura tar-ritorn, jekk issir, hija waħda ferm aktar kumplessa u ta’ taqtigħ il-qalb.
Fir-rigward tkellimna mal-avukata Carina Nagaih li min-naħa tagħha pprovat titfa’ aktar dawl dwar ċirkostanzi kritiċi bħal dawn fejn omm jew missier jispiċċaw b’qalbhom maqsuma u moħħhom iberren bla waqfien biex jaraw kif se jġibu lil uliedhom lura d-dar.
Strument li jirregola koperazzjoni bejn il-pajjiżi
“Il-Konvenzjoni tal-Aja u b’mod partikolari, il-Konvenzjoni tal-25 ta’ Ottubru tal-1980 ”The Hague Convention on the Civil Aspects of International Child Abduction” hija strument li jirregola koperazzjoni bejn il-pajjiżi li huma membri tal-istess Konvenzjoni. Dan biex minuri li jkunu ġew maħtufa minn ġenitur wieħed u jkunu qegħdin jiġu miżmuma b’mod illegali f’pajjiż ieħor, jiġu ritornati lura b’mod spedit u effiċjenti, f’dak il-pajjiż li fih il-minuri għandhom ir-residenza abitwali tagħhom,” spjegat Dott. Nagaih.
Din l-avukata qaltilna li Malta hija firmatarja ta’ din il-Konvenzjoni u allura, l-effetti legali ta’ tali Konvenzjoni japplikaw għal Malta. Għaldaqstant, kull pajjiż li huwa membru tal-Konvenzjoni jappunta uffiċċju biex jassisti individwi fl-applikazzjoni ta’ tali Konvenzjoni.
Spjegat kif, “fil-każ ta’ pajjiżna, Awtorità ta’ Standards ta’ Ħarsien Soċjali hija l-korp kompetenti għat-tħaddim u l-applikazzjoni ta’ din il-Konvenzjoni. Għalhekk, fi kliem sempliċi, dan ifisser li ġenitur f’Malta, li ibnu jew bintu ġew meħuda b’mod illegali jew qegħdin ikunu miżmuma b’mod illegali f’pajjiż ieħor mill-ġenitur l-ieħor u dana meta ir-residenza abitwali tal-wild kien f’Malta, jagħmel kuntatt mal-Awtorità ta’ Standards ta’ Ħarsien Soċjali tramite l-avukat tal-fiduċja tiegħu biex ibnu jew bintu, jiġi ritornat lura f’Malta.
L-awtorità f’Malta tieħu ħsieb li tikkomunika mal-awtorità barranija biex l-awtorità li tinsab fil-pajjiż barrani tistwixxi proċeduri fil-Qrati tal-pajjiż esteru biex ikun hemm ir-ritorn tal-minuri”.
Il-Konvenzjoni toffri għodda importanti
Dott. Nagaih qalet li l-effetti u l-applikabilità tal-Kovenzjoni japplikaw biss għall-pajjiżi membri ta’ tali Konvenzjoni. “Għalhekk”, kompliet l-avukata, “f’każ li minuri se jittieħed jew jinżamm minn ġenitur f’pajjiż li mhuwiex membru tal-Konvenzjoni, il-ġenitur l-ieħor ma jistax juża l-għodda legali li toffri din il-Konvenzjoni.
Dan ma jfissirx li mhemmx soluzzjonijiet. Iżda, filwaqt li fir-rigward f’każ ta’ applikabilità tal-Konvenzjoni tkun l-awtorità kompetenti li tistitwixxi proċeduri fil-Qorti barranija u l-istat membru huwa obbligat li f’każ li l-kondizzjonijiet tal-Konvenzjoni huma sodisfatti jordna r-ritorn, meta ma hemmx l-applikazzjoni tal-Konvenzjoni, irrid ikun il-ġenitur li jistitwixxi proċeduri ġudizzjarji fil-Qorti barra minn xtutna”.
Għalhekk, per eżempju, f’każ ta’ safar ta’ minuri, din l-avukata bi snin ta’ esperjenza tagħti l-parir li jkun tajjeb li ġenitur ikun informat minn qabel jekk il-pajjiż ta’ destinazzjoni huwiex firmatarju jew le ta’ din il-Konvenzjoni.
“Dan biex, fejn huwa possibbli, kull deċiżjoni fir-rigward ta’ safar tal-minuri tkun dejjem deċiżjoni infurmata,” temmet Dott. Carina Nagaih.
