“Ridt inkompli navvanza fl-istudji tiegħi. Ridt insegwi kors f’Master of Business Administration. Kelli ‘scholarship’ għal istituzzjoni edukattiva f’Malta. Ħallast aktar minn €5,000. Ħallejt lil familti warajja. Kollox kien sejjer kif suppost, sakemm f’daqqa waħda inqalgħet kwistjoni. Kelli bżonn inmur pajjiżi minħabba problemi mediċi. Meta rritornajt lura sibt ħajt sħiħ quddiemi. Agħar minn hekk fadalli biss fit jiem hawn u tiskadi l-visa u jkolli nitlaq. Għaliex qiegħed niġi trattat hekk? Ħallast il-flus u kull ma rrid hu li nkompli l-kors li applikajt għalih. Minflok l-uniku dikjarazzjoni li smalt minn rappreżentanti ta’ din l-istituzzjoni edukattiva hi “ippakkja kollox u mur lura lejn pajjiżek”.
Din hi l-karba ta’ student Indjan, li l-karba tiegħu saħansitra għamilha lill-għola awtoritajiet tal-pajjiż. Ishaan (isem mibdul biex nipproteġu l-identità tiegħu), jitkellem ma’ IT-TORĊA b’qalbu maqsuma għal mod kif ġie trattat. Imma din mhix is-sitwazzjoni tiegħu. Fl-aħħar jiem kien hemm steudenti oħrajn li ffaċċjaw sitwazzjoni simili. Każijiet li qegħdin jikkawżaw ansjetà u tensjoni kbira fost dawn l-istudenti. Fi kliemhom stess, “għaliex trattati ta’ numri?”. “Aħna nies ukoll”. “Ħallasna eluf ta’ ewro biex ġejna, għalfejn qegħdin niġu trattati hekk?”. “Għalhekk qegħdin nitwaqqfu, ma’ l-iċken intopp?”.
Tlaqt bit-tama li nlesti l-kors
Ishaan jiddikjara ma’ IT-TORĊA li “jien student internazzjonali li qed insegwi kors ta’ Master of Business Administration (MBA) fil-qasam tal-Eċċellenza fit-Tmexxija (Leadership Excellence) fl-Ascenscia Business School, fil-Furjana, Malta. Ninsab iħasseb dwar l-isfidi li jiffaċċjaw studenti minn pajjiżi terzi f’Malta. Wasalt Malta bil-ħolma li nlesti l-edukazzjoni ogħla tiegħi u nibni futur aħjar għalija nnifsi. Bħal ħafna studenti internazzjonali oħra, investejt ammont konsiderevoli ta’ flus, ħin u sforz fl-edukazzjoni tiegħi, u tlaqt minn pajjiżi u mill-familja tiegħi bit-tama li nlesti l-kors tiegħi b’suċċess. Sfortunatament, issa qed niffaċċja l-possibbiltà ta’ qsim il-qalb li jkolli nirritorna lejn pajjiżi mingħajr kwalifika, minħabba li l-kors tiegħi ġie mitmum minħabba nuqqas ta’ attendenza, minkejja li kien għad fadalli biss erba’ xhur biex inlesti l-lawrja tiegħi.”
Għaliex nuqqas ta’ attendenza? X’ġara?
Nistaqsuha għaliex kien hemm nuqqas ta’ attendenza u hu jgħidilna li “n-nuqqas ta’ attendenza tiegħi ma kienx riżultat ta’ negliġenza lejn l-istudji tiegħi. Matul dak il-perjodu, kont qed inbati minn problemi ta’ saħħa u kelli nirritorna lejn pajjiżi minħabba ċ-ċirkostanzi mediċi tiegħi. Kont qed niffaċċja diffikultajiet mediċi, u l-assenza tiegħi kienet marbuta ma’ dawn iċ-ċirkostanzi. Nifhem l-importanza tar-rekwiżiti tal-attendenza, iżda kont sinċerament qed nittama li s-sitwazzjoni tiegħi setgħet tiġi kkunsidrata bi ftehim u kompassjoni. Meta mort għand l-amministrazzjoni tal-kulleġġ biex nispjega ċ-ċirkostanzi tiegħi u nitlob l-għajnuna, esperjenzajt dak li emozzjonalment ħallini imnikket ħafna. Allegatament, membru wieħed mill-istaff amministrattiv għolla leħnu miegħi u qalli kliem fis-sens ta’: “ippakkja l-affarijiet tiegħek u erġa’ lura lejn pajjiżek.”
“Dan kliem li jweġġgħek”
Ishann jgħidilna li “li nisma’ kliem bħal dan meta diġà kont qed niffaċċja problemi ta’ saħħa u kont inkwetat dwar il-futur tiegħi kien ta’ wġigħ kbir. Mort għand l-amministrazzjoni biex infittex gwida u soluzzjoni possibbli, mhux biex noħloq problemi. Nemmen li kull student jistħoqqlu jiġi ttrattat b’dinjità u rispett, irrispettivament min-nazzjonalità jew miċ-ċirkostanzi tiegħu. B’rispett, nixtieq nistaqsi: student internazzjonali li jkun investa ammont sostanzjali ta’ flus fl-edukazzjoni tiegħu u jkun ġie Malta b’aspirazzjonijiet ġenwini għandu jiġi ttrattat b’dan il-mod? Nifhem bis-sħiħ li l-istituzzjonijiet edukattivi għandhom regoli u rekwiżiti dwar l-attendenza. Madankollu, nemmen li għandu jkun hemm ukoll opportunità raġonevoli għall-istudenti li jiffaċċjaw diffikultajiet mediċi ġenwini biex jispjegaw iċ-ċirkostanzi tagħhom u li l-każijiet tagħhom jiġu rieżaminati b’mod ġust. L-ebda student m’għandu jħossu umiljat jew imwarrab meta jitlob l-għajnuna. Ippruvajt nikkuntattja diversi membri tal-amministrazzjoni tal-kulleġġ sabiex insib soluzzjoni, iżda sfortunatament għadni ma rnexxilix insolvi s-sitwazzjoni. Billi fadalli biss erba’ xhur biex inlesti l-MBA tiegħi, inħossni meqrud bil-possibbiltà li l-vjaġġ edukattiv kollu tiegħi jista’ jispiċċa mingħajr ma nikseb kwalifika.
Għadni qed nittama li l-kulleġġ jista’ jippermettili nlesti l-parti li fadal mill-kors tiegħi online minn pajjiżi, jew inkella jikkunsidra li jagħtini kwalifika xierqa abbażi tal-krediti ECTS li diġà ksibt, dejjem skont ir-regolamenti akkademiċi applikabbli.”
It-tħassib tiegħi imur lil hinn miċ-ċirkostanzi tiegħi
Jgħidilna li “ktibt lill-ogħla awtoritajiet tal-pajjiż. It-tħassib tiegħi imur lil hinn miċ-ċirkostanzi personali. Nixtieq ukoll nesprimi t-tħassib tiegħi f’isem studenti oħra minn pajjiżi terzi li jistgħu jkunu qed jiffaċċjaw diffikultajiet simili, fosthom problemi relatati mat-tiġdid tal-Karti ta’ Residenza Temporanja (TRC), dewmien amministrattiv, u l-isfidi biex jibbilanċjaw ir-rekwiżiti tal-immigrazzjoni mar-regoli stretti tal-attendenza akkademika. L-istudenti jiġu Malta b’tamiet ġenwini li jiksbu edukazzjoni u joħolqu futur aħjar għalihom infushom. Huma jħallsu l-miżati tat-tagħlim, l-ispejjeż tal-akkomodazzjoni u l-ispejjeż tal-ħajja, ħafna drabi billi jużaw it-tfaddil tal-familji tagħhom jew jidħlu għal impenji finanzjarji sostanzjali. Meta jiffaċċjaw problemi mediċi, inċertezza dwar id-dokumentazzjoni tar-residenza jew diffikultajiet amministrattivi, jeħtieġu gwida ċara u opportunità ġusta biex jispjegaw iċ-ċirkostanzi tagħhom.”
Jisħaq li “ninsab imħasseb li, fin-nuqqas ta’ komunikazzjoni effettiva u appoġġ xieraq, xi studenti jistgħu jiffaċċjaw konsegwenzi akkademiċi li jipperikolaw il-progress edukattiv tagħhom. Nemmen li dan it-tħassib jistħoqqlu eżami bir-reqqa sabiex jiġi stabbilit jekk hemmx bżonn ta’ titjib fil-mod kif jiġu ttrattati dawn il-każijiet. Nixtieq li jkun hemm konsiderazzjoni taċ-ċirkostanzi individwali tiegħi, inklużi d-diffikultajiet mediċi li wassluni biex nirritorna lejn pajjiżi u t-terminazzjoni tal-kors tiegħi meta kien għad fadalli biss erba’ xhur biex inlesti. Hemm it-tħassib tiegħi dwar l-imġiba tal-istaff, inkluż ir-rimarka rrappurtata li kelli nippakkja l-affarijiet tiegħi u nerġa’ lura lejn pajjiżi meta tlabt l-għajnuna. Nemmen li hemm bżonn li wieħed jara l-isfidi li jiffaċċjaw l-istudenti minn pajjiżi terzi fir-rigward tat-tiġdid tal-Karti ta’ Residenza Temporanja (TRC), u jekk dewmien amministrattiv jew inċertezza jistgħux jikkontribwixxu għal diffikultajiet akkademiċi. Nemmen li hemm bżonn koordinazzjoni aktar ċara bejn l-awtoritajiet rilevanti u l-istituzzjonijiet edukattivi, sabiex diffikultajiet mediċi jew amministrattivi ġenwini jkunu jistgħu jiġu kkunsidrati qabel ma l-istudenti jiffaċċjaw konsegwenzi akkademiċi irriversibbli. Hemm bżonn ukoll proċeduri ċari għall-ilmenti u l-appelli, sabiex l-istudenti internazzjonali jkunu jafu fejn jistgħu jfittxu l-għajnuna u jkunu jistgħu jqajmu t-tħassib tagħhom mingħajr biża’ li jiġu mwarrba jew trattati b’nuqqas ta’ rispett.”
Piż emozzjonali kbir
Ishaan jgħid lil IT-TORĊA li “din l-esperjenza kienet ta’ piż emozzjonali u finanzjarju enormi għalija. Ġejt Malta biex nistudja, mhux biex nispiċċa nirritorna lejn pajjiżi b’idejja vojta meta kont daqshekk qrib li nilħaq l-għan tiegħi. Ħdimt bis-sħiħ, investejt fl-edukazzjoni tiegħi u ppruvajt infittex l-għajnuna permezz tal-mezzi uffiċjali xierqa. Irrikorrejt għand l-ogħla awtoritajiet biex forsi jgħinuni.
Itenni li “tkellimt mhux biex nimplika li kull student minn pajjiż terz jiffaċċja l-istess problemi, iżda biex nitlob eżami dwar jekk is-sistemi eżistenti jipprovdux biżżejjed ċarezza, appoġġ u proċeduri ġusti meta jinqalgħu diffikultajiet. Il-messaġġ tiegħi huwa sempliċi: l-istudenti internazzjonali għandhom ikunu responsabbli għall-osservanza tar-regoli, iżda s-sistemi li jaqduhom għandhom ikunu wkoll trasparenti, ġusti, aċċessibbli u rispettużi. B’rispett, nitlob lill-Gvern, lill-Parlament, lill-awtoritajiet edukattivi, lill-organizzazzjonijiet tal-istudenti u lis-soċjetà ċivili biex jeżaminaw dan it-tħassib u jaħdmu lejn titjib prattiku li jista’ jgħin biex jiġu evitati interruzzjonijiet fl-edukazzjoni u fil-futur tal-istudenti li setgħu jiġu evitati.”
IT-TORĊA stħarrġet każi ta’ studenti Indjani…..problemi diversi
fejn dawn l-istudenti jispiċċaw darhom mal-ħajt
Minn stħarriġ li għamlet IT-TORĊA jirriżulta li hemm problemi diversi li dawn l-istudenti jiffaċċjaw f’pajjiżna u li hemm minnhom spiċċaw fi problemi emozzjonali u anke mentali. Fost il-problemi hemm dewmien fil-permessi ta’ residenza u inċertezza. L-istudenti jistgħu jesperjenzaw inċertezza meta l-applikazzjonijiet jew it-tiġdid tal-permessi jieħdu aktar żmien milli mistenni. Għalhekk hu essenzjali li jkun hemm miri ċari għall-ipproċessar tal-applikazzjonijiet, aġġornamenti utli dwar l-istatus tagħhom u gwida bil-miktub dwar ir-regoli applikabbli.
Riskju ta’ interruzzjoni fl-edukazzjoni
Problema oħra hi dik ta’ l-inċertezza dwar l-istatus tal-immigrazzjoni jew il-proċeduri amministrattivi. Din toħloq diffikultajiet fir-reġistrazzjoni, fl-attendenza, fl-eżamijiet u fil-progress akkademiku. Hu ċar li l-awtoritajiet għandhom jipprovdu gwida ċara dwar l-għażliet legali disponibbli għall-istudenti li l-każijiet tagħhom ikunu għadhom pendenti.
Appoġġ insuffiċjenti waqt emerġenzi mediċi
Tqum problema marbuta ma’ studenti li jimirdu serjament jew ikollhom jirritornaw temporanjament lejn pajjiżhom jistgħu jsibuha diffiċli biex jifhmu kif l-assenza tagħhom taffettwa l-istudji tagħhom. L-istituzzjonijiet edukattivi għandu jkollhom proċeduri trasparenti biex jikkunsidraw ċirkostanzi mediċi dokumentati u każijiet eċċezzjonali, fejn ir-regolamenti akkademiċi jippermettu dan.
Tmiem tal-kors mingħajr fehim ċar tar-rimedji disponibbli
Hemm problemi marbutin ma’ tmiem tal-kors u nuqqas ta’ ftehim ċar. Meta jintemm il-kors ta’ student, dan għandu jirċievi r-raġunijiet bil-miktub, informazzjoni dwar ir-regoli applikati u spjegazzjoni ċara dwar kif jista’ jappella mid-deċiżjoni. L-istudenti għandhom ikunu jistgħu jifhmu l-għażliet tagħhom qabel ma l-pjanijiet edukattivi tagħhom jiġu affettwati b’mod permanenti.
Inċertezza dwar il-krediti akkademiċi miksuba u l-miżati mħallsa
L-istudenti jeħtieġu informazzjoni trasparenti dwar il-krediti akkademiċi li jkunu kisbu, il-miżati li jkunu ħallsu, u jekk ikunux disponibbli l-possibbiltajiet ta’ trasferiment tal-krediti, dħul mill-ġdid fil-kors, rifużjonijiet skont it-termini applikabbli, jew rotot alternattivi biex itemmu l-istudji tagħhom. Dawn il-kwistjonijiet għandhom jiġu evalwati skont ir-regoli akkademiċi, kuntrattwali u legali rilevanti.
Tħassib dwar trattament rispettuż u ugwali
L-istudenti internazzjonali għandhom jiġu ttrattati b’dinjità meta jfittxu l-għajnuna. Kull allegazzjoni ta’ trattament diskriminatorju jew mhux xieraq għandha tiġi eżaminata permezz ta’ proċess ta’ lment ġust u aċċessibbli, irrispettivament min-nazzjonalità tal-istudent.
Appoġġ mifrux fost diversi entitajiet u responsabbiltajiet mhux ċari
L-istudenti jistgħu jsibuha diffiċli biex jidentifikaw jekk kwistjoni taqax taħt ir-responsabbiltà tal-kulleġġ tagħhom, tar-regolatur tal-edukazzjoni, tal-awtoritajiet tal-immigrazzjoni jew ta’ korp pubbliku ieħor. Sistema ċara ta’ riferiment u sors ċentrali ta’ informazzjoni affidabbli jgħinu lill-istudenti jaslu għand l-awtorità t-tajba aktar malajr.
Biża’ milli jitressqu lmenti
Hu ċar li hemm studenti li joqogħdu lura milli jirrapportaw problemi għax jibżgħu li dan jista’ jaffettwa l-istudji jew l-istatus ta’ residenza tagħhom. Huwa importanti li jkun hemm mezzi aċċessibbli biex jitressqu lmenti, salvagwardji ċari għall-kunfidenzjalità u protezzjoni kontra ritaljazzjoni meta lmenti jitressqu in bona fede.
X’hemm bżonn isir
Quddiem dawn il-problemi u diffikultajiet, hemm bżonn il-pubblikazzjoni ta’ standards ċari dwar iż-żmien tas-servizz u l-għoti ta’ aġġornamenti regolari dwar l-applikazzjonijiet u t-tiġdid tal-permessi ta’ residenza għall-istudenti. Ma’ dawn it-twaqqif ta’ proċess għal każijiet urġenti fejn dewmien amministrattiv ikun qed jhedded skadenzi akkademiċi importanti. L-inkoraġġiment lill-istituzzjonijiet edukattivi biex jadottaw politiki trasparenti dwar emerġenzi mediċi u ċirkostanzi eċċezzjonali oħra. L-iżgurar li l-istudenti jirċievu deċiżjonijiet bil-miktub, skadenzi ċari għall-appelli u aċċess għal rieżami indipendenti xieraq. L-obbligu li tingħata informazzjoni ċara dwar il-krediti miksuba u dwar kwalunkwe għażla disponibbli biex l-istudenti jkomplu l-istudji tagħhom jew jittrasferixxu għal kors ieħor.
- Hemm bżonn titjib tal-koordinazzjoni bejn l-awtoritajiet tal-immigrazzjoni, ir-regolaturi tal-edukazzjoni u l-istituzzjonijiet edukattivi liċenzjati. Hemm bżonn ukoll il-kunsiderazzjoni ta’ diskussjoni parlamentari dwar is-salvagwardji meħtieġa biex jipproteġu lill-istudenti minn pajjiżi terzi, filwaqt li jinżammu l-liġijiet tal-immigrazzjoni u l-istandards akkademiċi ta’ Malta.