Wara ġimgħat ta’ negozjati, il-klabbs membri kollha laħqu ftehim unanimu biex jirriformaw is-sistema tad-distribuzzjoni tad-dħul fl-istadia, bil-għan li jippremjaw lill-klabbs li jattiraw l-akbar numru ta’ partitarji billi jippermettulhom iżommu d-dħul mill-bieb iġġenerat mill-partitarji tagħhom stess.
Il-klabbs qablu wkoll li jabolixxu l-VIP cards mingħajr ħlas.
Minn dan l-istaġun, l-ebda cards b’xejn mhu se jinħarġu u l-cards tal-istaġun kollu u VIP se jkunu soġġetti għal ħlas. Fl-istess ħin, se jinżamm element ta’ solidarjetà fost il-klabbs kollha, biex jiġi żgurat li s-sistema l-ġdida tibbilanċja l-mertu mal-appoġġ kollettiv.
Din ir-riforma tirrappreżenta pass importanti ieħor għall-kampjonat, peress li timmodernizza mekkaniżmu li kien baqa’ fil-biċċa l-kbira l-istess għal għexieren ta’ snin.
Il-mudell il-ġdid huwa mistenni li jħeġġeġ lill-klabbs biex jagħtu aktar enfasi fuq l-involviment tal-partitarji, inaqqsu l-kultura tal-aċċess b’xejn, u jaħdmu b’mod attiv lejn iż-żieda fl-attendenza u d-dħul mill-ġranet tal-logħob.
L-inizjattiva tmexxiet minn Dr Joseph Muscat u Alan Abela, li konsistentement appoġġjaw dawn ir-riformi u ħadmu mill-qrib mal-klabbs biex jibnu l-kunsens meħtieġ għall-implimentazzjoni tagħhom.
L-isforzi tagħhom kienu mmexxija mit-twemmin li mudell ta’ dħul mill-bibien aktar sostenibbli u bbażat fuq il-mertu fl-aħħar mill-aħħar isaħħaħ il-kampjonat u jinċentiva lill-klabbs biex jinvestu aktar fit-tkabbir tal-bażi tal-partitarji tagħhom.