Jamie Webster għandu 28 sena u huwa kantant u kitarrista minn Liverpool kif ukoll kittieb tal-mużika.
Għall-bidu huwa kien jaħdem bħala electrician fejn kien ikollu ħafna ħidma relatata ma’ installazzjonijiet elettroniċi u postijiet ġodda. Madankollu hu kellu wkoll passjoni oħra … dik tal-mużika.
Fil-fatt f’kull tmiem il-ġimgħa huwa kien idoqq f’pubs Ingliżi partikolarment f’Liverpool fejn mill- ewwel kien jisraq ix-xena bl-entużjażmu fil-kant u d-daqq ta’ diversi cover versions.
F’Ottubru 2020, waqt il-perjodu tal-Covid-19 huwa ħareġ l-ewwel album tiegħu bl-isem ta’ We Get By li bl-għajnuna ta’ Modern Sky UK wasal fis-sitt post tal-klassifiċi ewlenin Ingliżi.
Fl-istess sena, Webster ħareġ numru ta’ diski relatati mal-football li wkoll kellhom popolaritá kbira filwaqt li bdew jindaqqu wkoll mir-radjijiet lokali.
Madankollu l-aqwa tal- karriera ta’ Jamie Webster kienet għadha ġejja hekk kif beda jinvolvi ruħu waqt il-logħbiet ta’ Liverpool, it-team li tant iħobb. Saħansitra l-ġurnal influwenti Ingliż The Guardian laqqmu bħala l-kantant uffiċjali tal-club.
Aktar qabel Webster kien diġá beda juri t-talenti tiegħu bħala mużiċist speċjalment fil-bliet ta’ Kiev u Madrid fejn waqt finali tal-UEFA Champions League huwa kanta quddiem 60,000 spettatur. Għalih dan kien l-isbaħ mument li qatt għadda minnu.
Mingħajr ma trid meta titkellem dwar Liverpool u d-divertiment li jinħoloq qabel u wara logħba f’Anfield Road, ħsibijietek imorru lejn Jamie Webster li ħafna players verament iħobbuh u jammirawh.
Aktar minn hekk il-coach, Jurgen Klopp, stqarr li jieħu gost jara lil Webster waqt il-wirjiet tiegħu u huwa għalhekk li ġieli jmur sa ħdejh f’xi post tad-divertiment li fih ikun qed ikanta.
Dan il-ġurnal tkellem ma’ Webster li kien f’pajjiżna fejn tkellem dwar iż-żewġ imħabbiet tiegħu … il-mużika u Liverpool FC.
Kif bdiet l-imħabba tiegħek lejn il-mużika?
Bdejt inħobb il-mużika sa minn meta kont żgħir. Kulfejn kont inkun, dejjem kont inġorr ir-radju miegħi. Jekk kont inkun f’kamra, ir-radju dejjem kien ikun mixgħul u anke fil-karozza ta’ missieri kont nagħmel ċert li nisma’ l-mużika. Mingħajr mużika jien ma ngħix!
Apparti minn hekk meta kont żgħir kont inkanta ħafna u anke kont nilgħab bil-kitarra ż-żgħira li kienu xtrawli.
Meta kont żagħżugħ, kont niffrekwenta diversi postijiet ta’ divertiment bil-mużika pop u techno li dejjem kienu l-favoriti tiegħi.
Madankollu int mhux minn dejjem kont mużiċist minħabba li għamilt żmien taħdem bħala electrician ….
Iva. Fil-fatt għamilt disa’ snin naħdem fl-elettriku. Ovvjament dan ix-xogħol fih ħafna tbatija u għalkemm nammetti li kont tajjeb fih, bdejt inħoss li posti mhux f’dan is-settur.
Kien għalhekk li bdejt nimraħ aktar lejn il-mużika u nkompli niżviluppa t-talenti tiegħi bħala mużiċist. Meta rajt li stajt niżviluppa aktar dawn it-talenti, iddeċidejt li nieqaf minn electrician u niddedika ħini għall-mużika.
Ismek huwa sinonimu mal-club ta’ Liverpool. X’ifisser dan it-club għalik?
Dan il-club ifisser kollox għalija. Jien trabbejt u kbirt f’din il-belt u għalhekk hi xi ħaġa nornali li nkun miġbud lejn ir-Reds.
Minn dejjem kont immur nara l-logħob tagħhom fil-”monument” (għax jien hekk insejjaħlu) li għandna f’Anfield Road. F’dawn is-snin kemm ilu nsegwihom rajt diversi players ta’ kalibru li lagħbu bil-flokk aħmar fosthom Robbie Fowler, Steven Gerard u riċentement Mohamed Salah.
X’taħseb fuq Liverpool tal-istaġun li għadu kif intemm?
Kienu verament żvinturati li ma ħadux il-kampjonat wara li kisbu 92 punt minn 38 logħba. M’hemmx dubju li Manchester City kienu ostaklu diffiċli iżda t-twam baqa’ jemmen sal-aħħar li seta’ jirbaħ il- kampjonat.
Ma nistax ma nsemmix ir-rebħ tal-League Cup u tal-FA Cup li wkoll kienu suċċessi tajbin. B’xorti ħażina ma wasalniex biex irbaħna l-UEFA Champions League minkejja li lgħabna ferm tajjeb kontra Real Madrid.
Minkejja kollox, fiduċjuż għall-futur tal-club li se jkun wieħed pożittiv.
X’taħseb dwar il-coach Jurgen Klopp?
Fl-opinjoni tiegħi, Jurgen Klopp hu l-coach ideali għal Liverpool. Huw coach kapaċi ħafna iżda barra minn hekk għandu l-lat uman tiegħu fejn apparti li huwa motivatur kbir, jagħtik kuraġġ kbir.
Jien personalment kont sorpriż mill-istess Klopp meta kien ġie jarani waqt li kont għaddej indoqq fi club tal-partitarji ta’ Liverpool. Verament kont kuntent u onorat biż-żjara tiegħu fejn prattikament hu ħassu wieħed minna waqt dan l-avveniment.
Int kellek iċ-ċans iddoqq ukoll f’kunċerti tat-tfal. Kif tħossok meta tkun qed tagħmel dan ix-xogħol quddiem dawn iċ-ċkejknin?
Niftakar okkażjoni partikolari meta daqqejt quddiem folla kbira ta’ tfal f’Anfield. Kienet okkażjoni ferm sabiħa fejn ħadu pjaċir u kantaw għall-mużika li bdejt nipprovdilhom.
Dawn it-tfal għada pitgħada jikbru u jsiru żgħażagħ, irġiel u nisa u li se jkomplu jagħtu s-sapport lil dan it-team ferm għal qalbna.
Tista’ tgħtina d-dettalji dwar il-wirja tiegħek qabel il-finali tal-UEFA Champions League f’Pariġi din is-sena u sentejn ilu f’Madrid?
Iva. Il-UEFA kienu stednuni sabiex inkun parti mill-mużiċisti li kienu se jieħdu sehem fil-parti tad- divertiment ta’ qabel il-finali. Għalija kienet xi ħaġa kbira li ndoqq quddiem madwar 60,000 spettatur speċjalment meta inkludejt id-diska “Allez Allez Allez” fejn hemmhekk stajt nara l-folla tipparteċipa bil-kbir.
X’taħseb dwar is-suq tat-trasferimenti tas-sajf?
Għadna kif akkwistajna lil Fabio Carvalho mingħand Fulham kif ukoll lil Darwin Nunez mingħand Benfica, b’dan tal-aħħar ikun għal somma rekord ta’ £85 miljun.
Peró ninsabu viċin ħafna li nitilfu lil Sadio Mane li se jingħaqad ma’ Bayern Munich.
X’taħseb dwar il-Gżejjer Maltin?
Din hi t-tieni okkażjoni li ġejt f’Malta. Inħossni ferm kuntent li ġejt għal ftit tal-jiem hawnhekk. L-iktar post li affaxxinani huwa San Ġiljan minħabba l-ambjent li hemm u l-baħar sabiħ li hu mdawwar bih.
X’se jkun il-futur ta’ Jamie Webster?
Il-futur ħadd ma jafu. Jien se nkompli nirsisti dejjem aktar sabiex inkompli noħroġ aktar mużika u fuq kollox niddeverti lill- pubbliku li jiġi jara l-wirjiet tiegħi.
Nixtieqek tgħaddi messaġġ lill-partitarji kollha ta’ Liverpool speċjalment dawk ġewwa pajjiżna.
Liverpool huwa wieħed mill-aqwa timijiet tad-dinja … li kiseb suċċessi kbar f’dawn l-aħħar snin u se jkompli jiddomina x-xena tal-football.
Ovvjament jien se ngħidilhom sentenza sinonima ma’ dan il-club: “You’ll never walk alone!”