Kumpanija Amerikana li tippossjedi l-klabb Taljan tas-Serie B, Cesena, se takkwista sehem maġġoritarju f’Hibernians FC wara vot unanimu mill-membri tal-klabb.
Il-vot se jara lil Hibernians jinbidlu fi ‘Sport Limited Liability Company’, b’Sunday Ventures bħala l-azzjonist maġġoritarju tagħha.
Sunday Ventures, immexxija miċ-chairman Mike Melby, se tieħu l-kontroll tal-klabb storiku tal-futbol Malti filwaqt li Ranier Bezzina se jkollu sehem minoritarju sinifikanti. L-10 fil-mija li jifdal tal-klabb se jkunu proprjetà tal-Fondazzjoni tal-Membri kif mitlub mil-liġi.
Il-vot ittieħed fil-Laqgħa Ġenerali Annwali tal-klabb fit-Tony Bezzina Stadium.
Sunday Ventures (SV) hija ‘holding cmopany’ Amerikana ffukata fuq l-isport b’sidien maġġoritarji tat-tim Taljan tas-Serie B Cesena u involviment fil-privatizzazzjoni tal-klabb Brażiljan tas-Serie B Avaí FC (Serie B Brażiljana) – il-klabb li pproduċa stilel mondjali inklużi Raphinha ta’ Barcelona u Gabriel ta’ Arsenal.
Sunday Ventures qed tfittex ukoll sehem maġġoritarju fi klabb Skandinav ewlieni.
Fi stqarrija, Hibernians FC qalu li l-familja Bezzina, li mexxew il-klabb minn Raħal Ġdid b’dedikazzjoni għal kważi 50 sena se tibqa’ parti integrali mill-futur tal-klabb.
“Ranier Bezzina jkompli bħala president tal-klabb, u jiżgura l-kontinwità tat-tmexxija tal-familja u l-konnessjoni profonda ma’ Hibernians li l-partitarji tagħna jafu u jgħożżu,” qalet id-dikjarazzjoni.
“Mike Melby, iċ-Chairman ta’ Sunday Ventures, se jservi bħala chairman tal-klabb, appoġġjat mill-konsulent operattiv tiegħu Emiliano Salvarezza – eks Maniġer Ġenerali ta’ Sampdoria – li se jaħdem mill-qrib kuljum mal-president Bezzina u t-tim fil-grawnd f’Paola.”
Melby għamilha ċara li l-investiment tagħhom f’Hibernians FC huwa mmirat lejn il-bini ta’ xi ħaġa sinifikanti.
“Hibernians FC jaqbel perfettament mal-istrateġija tagħna ta’ sjieda ta’ diversi klabbs, u nħarsu ’l quddiem biex ikun l-ewwel klabb tagħna li jikkompeti f’kompetizzjonijiet tal-UEFA,” qal Melby.
“Aħna qegħdin hawn għal żmien twil, u se nibdew nibnu proġett reżiljenti — mhux magħmul minn rebħiet malajr, iżda mmirat lejn il-bini ta’ xi ħaġa sinifikanti, globali u sostenibbli.”
Min-naħa tiegħu, Ranier Bezzina qal li l-inizjattiva hija mmirata lejn il-ftuħ ta’ triq ġdida għat-talent f’Hibernians FC.
“Dan huwa mument storiku mhux biss għall-klabb tagħna iżda wkoll għall-futbol Malti hekk kif sirna l-ewwel membru ta’ struttura ta’ Sjieda Multi-Klabb. Dan se jipprovdi perkors b’diversi direzzjonijiet għat-talent li fih Hibernians se jkollhom rwol ċentrali,” qal Bezzina.
Il-president Bezzina estenda wkoll il-gratitudni sinċiera tiegħu liċ-Chairman tal-Malta Premier League, Dr Joseph Muscat, li l-kontribut tiegħu kien kruċjali biex jiġi żgurat dan il-ftehim, kif ukoll lis-CEO tal-MPL Alan Abela, il-viċi president tal-MFA Dr Matthew Paris, u l-avukat Jason Azzopardi għall-appoġġ imprezzabbli tagħhom matul dan il-proċess.
Hibernians qalu li l-għeluq tal-ftehim huwa mistenni li jseħħ fil-ġimgħat li ġejjin, hekk kif il-klabb qed jipprepara b’eċitament għall-istaġun li ġej.