Naturalment, l-aħħar ġimgħa ta’ kampanja elettorali tkun l-aktar waħda mqanqla, b’kulħadd fuq ix-xwiek. Dan jiġri anke jekk kulħadd ikun jaf li l-istorja fatta. Aktar u aktar f’din il-kampanja li tmexxiet minn kulħadd qisha kienet kronaka ta’ rebħa mħabbra. Imma xorta…
Kollox ma’ kollox, kellna preżentazzjonijiet ċari u ċivili ta’ numru ta’ għażliet kbar fit-tmexxija tal-pajjiż, anke jekk ċerti għażliet importanti oħra tħallew barra. Ukoll, il-kampanja twaddbet fid-dell mill-gwerra li vara l-President Putin fl-Ukrajna. Imma xorta temi lokali biex ma ngħidilhomx parrokkjali baqgħu jitqanqlu u jiġu ripetuti.
B’mod moħbi se jkun hemm iċ-ċaqliq ta’ voti bejn il-kandidati fid-distretti differenti. Għalkemm anke hawn ftit jew wisq, l-andament ikun iċċara sew, aktar u aktar bl-istħarriġ tal-opinjoni li saru jagħmlu l-kandidati. Imma xorta għandha tibqa’ l-ħeġġa sal-aħħar mument biex kull vot li jista’ jintrebaħ personalment ma tħallihx jiżgiċċa.
***
REFUĠJATI
Mill-ġdid, l-Ewropa qed taffaċċja kriżi tar-refuġjati, did-darba minn nies ta’ ġens Ewropew. Il-pajjiżi li rrifjutaw refuġjati ftit tas-snin ilu, jinsabu fil-qalba tal-mewġa ta’ nies ġodda li qed jaslu mbikkma mil-lvant u qed jagħtuhom kull appoġġ – kemm bħala gvern, kemm bħala poplu.
Diffiċli tgħid kif din il-ġrajja se tiżviluppa. X’aktarx li mhijiex se tkun bħal meta r-refuġjati waslu mil-Lvant Nofshani. Tqanqal fond ta’ simpatija lejn ir-refuġjati tal-lum. Nittamaw li mhux ġej minn sentimenti razzisti, daqskemm minn għarfien ta’ kemm il-gwerra ta’ Putin qed tiġi miġġielda qrib iċ-ċentru tal-Ewropa. Jista’ jkun hemm il-ħsieb fost ħafna li jekk ir-refuġjati tal-lum se jibqgħu għat-tul “fostna”, se jsibuha ħafna aktar faċli jintegraw fis-soċjetajiet Ewropej minn dawk li waslu qabilhom. Biss, in-numru ta’ refuġjati mill-Ukrajna qed jilħaq livelli bla preċedent, ’il fuq minn żewġ miljuni u nofs.
***
INDUSTRIJA U MANIFATTURA
Żmien ilu, mhux daqstant bogħod, meta ngħidu “industrija” konna nifhmu manifattura, jiġifieri l-produzzjoni ta’ oġġetti f’fabriki. Mhux aktar. Il-kelma “industrija” llum tirreferi għal ħidma f’setturi ekonomiċi differenti, inklużi servizzi finanzjarji.
Fiż-żmien li qed insemmi, kulħadd kien jifhem li l-liġijiet u r-regolmenti li kienu jiddaħħlu biex jippromwovu l-iżvilupp industrijali – kif kien jissejjaħ – kienu intenzjonati għall-manifattura. Ma narax li l-użu tal-lum hu bidla għall-aħjar anke jekk wieħed jaqa’ lura għall-formola – what’s in a name?
B’industrija/manifattura konna nifhmu proċess komplikat li jimpjega numru sostanzjali ta’ nies f’azjenda waħda, b’investimenti u tagħlim ta’ snajja ta’ produzzjoni, li jipprovdu valur miżjud sinjifikanti. Dan ma jistax jingħad għal ħafna attivitajiet li jsiru fostna biex joħolqu ġid (?) purament finanzjarju, li saru jissejħu industriji.
